„Tiger, mamma vill fá eiginhandaráritun frá þér“

Sá Tiger Woods sem spilar golf þessa dagana er mun hressari og alþýðlegri en sá sem við þekktum er hann var á hátindi ferilsins. Þá var allt mjög alvarlegt.

Tiger var að taka æfingahring fyrir Valspar-meistaramótið í gær er ungur drengur mætti honum allt í einu á vellinum. Sá hafði laumað sér inn á völlinn fram hjá öryggisvörðunum.

Einhvern tímann hefði Tiger ekki haft neinn húmor fyrir slíkum uppákomum en það er annað upp á teningnum í dag. Tiger brosti og tók vinalega á móti þessum óvænta gesti.

Hann var í bol sem á stóð „Tiger, mamma vill fá eiginhandaráritun frá þér“. Tiger gat ekki annað en hlegið að þessu, áritaði bolinn, klappaði drengnum á höfuðið áður en hann fór.