Spá því að liðin sem misstu íslensku þjálfarana berjist um EM-gullið

Íslenska karlalandsliðið í handbolta endar í þrettánda sæti á Evrópumótinu í Króatíu ef marka má spá handboltasíðunnar handball-planet.com.

Það verða hinsvegar Danmörk og Þýskaland sem berjast um Evrópumeistaratitilinn en þeim er spáð efstu tveimur sætunum í þessari spá, Danmörku í 1. sæti og Þýskalandi í 2. sæti.

Þetta er fyrsta stórmótið síðan að umrædd lið, Danmörk og Þýskaland, misstu íslensku þjálfarana sem höfðu báðir unnið stórmótagull árið 2016.

Dagur Sigurðsson gerði Þýskaland að Evrópumeisturum 2016 og Danir unnu Ólympíugull undir stjórn Guðmundar Guðmundssonar í Ríó 2016.

Handball-planet.com spáir því að íslenska liðið komist ekki upp úr sínum riðli þar sem liðið mætir heimamönnum í Króatíu auk Svía og Serba.

Svíar, sem spila undir stjórn Kristjáns Andréssonar á EM, er spáð áttunda sætinu en lið Austurríkis, sem Patrekur Jóhannesson þjálfar, er spáð sextánda og síðasta sæti.

Spá handball-planet.com fyrir lokastöðu EM 2108:

1. sæti - Danmörk

2. sæti - Þýskaland

3. sæti - Noregur

4. sæti - Króatía

5. sæti - Frakkland

6. sæti - Spánn

7. sæti - Slóvenía

8. sæti - Svíþjóð

9. sæti - Ungverjaland

10. sæti - Serbía

11. sæti - Makedónía

12. sæti - Hvíta-Rússland

13. sæti - Ísland

14. sæti - Svartfjallaland

15. sæti - Tékkland

16. sæti - Austurríki