Kristinn snýr aftur heim

Kristinn Marinósson er farinn aftur heim og leikur með uppeldisfélaginu, Haukum, í Dominos-deildinni á næstu leiktíð. Karfan greinir frá.

Kristinn hefur leikið síðustu tvö tímabil með ÍR en í vetur var hann með tæp sjö stig og þrjú fráköst að meðaltali í leik.

Hann var þó meiddur fyrri hluta tímabilsins en í samtali við Karfan.is er hann ánægður með að vera kominn heim.

„Virkilega spenntur að vera kominn í rautt aftur. Ég skoðaði nokkra möguleika en flottur leikmannahópur sem ég þekki vel, frábær aðstaða og umgjörð og að sjálfsögðu mínir menn í Maníunni vógu þungt í minni ákvörðun,” sagði Kristinn.

Finnur Atli Magnússon mun ekki leika með Haukum á næstu leiktíð og Hilmar Pétursson er farinn í Breiðablik. Hilmar Smári Henningsson er snúinn aftur heim í Hauka frá Þór Akureyri.