Þingmenn neyðast til að nota netsíur til að verjast fjöldapósti rafrettuvina

Alþingismenn eru að drukkna í tölvupóstum frá reiðum rafrettu-unnendum. Mikill fjöldi, sem sennilega hleypur á hundruðum, hefur í dag áframsent skilaboð til þingmanna og stjórnmálaflokka þar sem svokölluðu veipfrumvarpi er mótmælt harðlega. Skilaboðin innihalda öll meira og minna sama texta og hafa borist bæði á samfélagsmiðlum og í hefðbundnum tölvupósti það sem af er degi.

Helgi Hrafn Gunnarsson, þingmaður Pírata, segir á Facebook það þetta hafi neytt þingmenn til að búa til sérstakar síur í pósthólfum sínum sem útiloki alla pósta sem innihalda orð á borð við „veip“ og „vape“.

Segir Helgi að vegna umfangs póstanna geti þingmenn ekki lengur sinnt skyldum sínum nema með því að sía út allt sem þeim berist um rafrettur. Vegna þessarar síu séu allar líkur á að þingmenn missi af því ef einhver sendir þeim efnislegan póst um veipmálið úr þessu. Allt grafist þetta undir endalausum fjölpósti um málið frá rafrettu-vinum.

Helgi segir það vissulega skiljanlega hugmynd að reyna að fanga athygli ráðamanna með þessum hætti og efast ekki um að fólki gangi gott eitt til. Hugmyndin sé engu að síður slæm þar sem hún dragi úr getu þingmanna til að kynna sér efnið og afli málefninu sjálfu engan stuðning. Hóp-póstar sem þessir skemmi fyrir öllum, bæði þingmönnum sem séu að reyna að vinna sína vinnu og þeim sem þurfi að koma upplýsingum til þingmanna um málefnið sem póstarnir fjalla um.

Samkvæmt upplýsingum fréttastofu hefur pósturinn um veipfrumvarpið einnig verið sendur ítrekað á Facebook síður allra helstu stjórnmálaflokka í dag. Einn þeirra sem stóð í slíkum sendingum sagðist enn engin svör hafa fengið að Pírötum undanskildum. Píratar lögðu fram sitt eigið frumvarp um rafrettur í fyrra sem er efnislega í mikilli andstöðu við þær takmarkanir sem koma fram í því frumvarpi sem nú liggur fyrir Alþingi.



Sem fyrr segir eru bréfin flest eins en með smávægilega breyttu orðalagi, textinn er svohljóðandi:

Góðan dag.

Ég vil koma því á framfæri við ykkur að þeir flokkar sem kjósa með vape frumvarpinu eiga ekki möguleika á mínu atkvæði í næstu kosningum.

Ég get ekki réttlætt það að kjósa flokk sem berst á móti bættri heilsu og skaðaminnkandi leið fyrir reykingarfólk. Hvað þá flokk sem ræðst með þessum hætti að frelsi einstaklingsins og gerir það að engu.

Virðingarfyllst,