Innlent

Þau eru tilnefnd sem Maður ársins 2018

Kolbeinn Tumi Daðason skrifar
Þau sem eru tilnefnd til Manns ársins.
Þau sem eru tilnefnd til Manns ársins. Vísir
Vísir og Bylgjan standa fyrir vali á Manni ársins 2018 og geta lesendur nú tekið þátt í að velja þá manneskju sem þeim þykir eiga nafnbótina skilið. Tæplega sjö þúsund tilnefningar bárust í gegnum vefinn og í símatíma Reykjavík síðdegis.

Þorgeir, Kristófer og Bragi í Reykjavík síðdegis á Bylgjunni og blaðamenn Vísis fóru yfir tilnefningarnar og rökstuðninginn sem þeim fylgdi. Nú er búið að yfirfara þær og ljóst hvaða tíu aðilar berjast um titilinn.

Hin tilnefndu má sjá hér að neðan í engri sérstakri röð. Neðst má svo greiða atkvæði. Kosning stendur til 28. desember. Tilkynnt verður um valið í þættinum Reykjavík árdegis á Bylgjunni á gamlársdag.

Kári Stefánsson 

Forstjóri Íslenskrar erfðagreiningar opnaði vefsvæði þar sem Íslendingar geta komist að því hvort þeir beri breytu í BRCA2 geni sem eykur verulega líkur á krabbameini. Þá var jáeindaskanni sem Íslensk erfðagreining fjármagnaði tekinn í notkun.

Benedikt Erlingsson

Leikstjóri kvikmyndarinnar Kona fer í stríð sem hefur sópað til sín verðlaunum á árinu og fékk meðal annars verðlaun Norðurlandaráðs auk LUX-kvikmyndaverðlauna Evrópuþingsins. Nýtti hann tækifærið við afhendingu verðlauna og minnti á mikilvægi baráttu gegn loftslagsbreytingum.

Guðmundur Fylkisson 

Lögregluþjónn og aðalvarðstjóri fylgir eftir beiðnum barnaverndar um leit að börnum sem hafa ekki skilað sér til síns heima. Á hverju ári er leitað að 80-90 börnum og þurfti að leita að einu tólf ára barni tuttugu sinnum.

Lilja Alfreðsdóttir

Mennta- og menningamálaráðherra þótti sýna hugrekki þegar hún lýsti samtali Miðflokksmanna á Klaustur bar sem ofbeldi. Þingmennirnir væru ofbeldismenn sem hefðu ekki dagskrárvald í íslensku samfélagi. Lilja þótti sýna staðfestu og einlægni í viðtali í Kastljósi.

Bára Halldórsdóttir

Uppljóstrarinn Marvin sem tók upp samtal þingmanna á Klaustur bar reyndist vera fötluð hinsegin kona. Bára kom upptöku af samtali þingmanna, þar sem svívirðingar fuku, í hendur fjölmiðla. Hún gæti átt yfir höfði sér málsókn frá þingmönnunum.

Einar Hansberg Árnason

Reri 500 kílómetra innan 50 klukkustunda í róðratæki hjá Crossfit Reykjavík til styrktar Kristínu Sif Björgvinsdóttur, sem missti eiginmann sinn á árinu, og fjölskyldu hennar.

Elísabet Margeirsdóttir 

Langhlaupakonan kom fyrst kvenna í mark í 400 kílómetra hlaupi í Góbí-eyðimörkinni í Kína. Hún var í níunda sæti og langfyrst kvenna eftir fjögurra sólarhringa hlaup bæði í eyðimerkusól og frosti.

Guðmundur Ragnar Magnússon 

Stýri- og sigmaður hjá Landhelgisgæslunni sem bjargaði fimmtán mönnum af skipinu Fjordvik sem strandaði í Helguvík í nóvember. Tvö rifbein Guðmundar brotnuðu við aðgerðirnar en hann hélt út og var síðasti maður frá skipi með skipstjórann í línunni.

Guðrún Björt Yngvadóttir

Var kjörin alþjóðaforseti Lions og tók við embættinu síðastliðið sumar til eins árs. Í 101 árs sögu hreyfingarinnar, sem eru stærstu samtök í heimi sinnar tegundar og starfa í 210 löndum, hefur kona aldrei gengt embættinu.

Bára Tómasdóttir

Móðir Einars Darra Óskarssonar átján ára pilts sem lést í maí eftir neyslu róandi lyfja. Bára fór fyrir forvarnarverkefninu „Ég á bara eitt líf“ sem höfða á til ungmenna og minnir á hættuna sem fylgi neyslu fíkniefna.



Tengdar fréttir

Mugison Maður ársins á Bylgjunni

Örn Elías Guðmundsson, betur þekktur sem Mugison, var valinn maður ársins hjá hlustendum Bylgjunnar nú í morgun. Tilkynnt var um valið í þættinum "Reykjavík árdegis“ en um stjórnartauma þar héldu þeir Kristófer Helgason, Þorgeir Ástvaldsson og Bragi Guðmundsson. Þeir eru vanari að vera í loftinu síðdegis en í dag, gamlársdag, varð breyting á.

Eiríkur Ingi maður ársins á Bylgjunni

Eiríkur Ingi Jóhannsson, sjómaður sem komst af eftir hryllilegan sjóskaða fyrr á árinu, er maður ársins á Bylgjunni árið 2012. Kosning fór fram bæði á Vísir.is sem og á Bylgjunni þar sem hlustendur hringdu inn og greiddu atkvæði sitt. Eiríkur Ingi fór með afgerandi sigur í kosningunni.

Edda Heiðrún maður ársins hjá Reykjavík síðdegis á Bylgjunni

Edda Heiðrún Backman leikkona er maður ársins í þættinum Reykjavík síðdegis á Bylgjunni. Tilkynnt var um þetta fyrir stundu og sigraði Edda með yfirburðum. Kjörinu var skipt í tvennt en fyrst gat fólk farið inn á Vísi og kosið hvern sem er.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.