Arnór Þór næstmarkahæstur í sigri

Landsliðsmaðurinn Arnór Þór Gunnarsson og félagar í Bergischer fengu Minden í heimsókn í þýsku úrvalsdeildinni í handbolta í dag.

Bergischer náði snemma undirtökunum í leiknum og leiddu heimamenn með þremur mörkum í leikhléi, 13-10. Bergischer hélt gestunum í hæfilegri fjarlægð allan leikinn og vann að lokum nokkuð öruggan fimm marka sigur, 26-21.

Arnór Þór skoraði fjögur mörk úr sex skotum en liðsfélagi hans, Tomas Babak var markahæsti leikmaður vallarins með fimm mörk.

Mikilvægur sigur fyrir Arnór og félaga þar sem þeir komast nú upp fyrir Minden í 7.sæti deildarinnar en liðin voru jöfn að stigum þegar kom að leiknum í dag.