Fimm og hálfs árs dómur fyrir tilraun til manndráps staðfestur

Landsréttur staðfesti í dag fimm og hálfs árs dóm yfir Anton Erni Guðnasyni fyrir tilraun til manndráps og líkamsárás í október árið 2017. Var Anton fundinn sekur af því að hafa stungið mann í kviðinn og taldi dómurinn að hending hafi ráðið því að ekki fór verr.

Alls voru fjórir ákærðir í málinu en auk Antons hlaut Samúel Jói Björgvinsson 22 mánaða fangelsisdóm fyrir að slá manninn sem varð fyrir hnífsstungunni með kassagítar.

Sá þriðji er pilturinn sem fæddur er árið 2000 en hann hlaut sex mánaða skilorðsbundinn dóm fyrir líkamsárás gegn manninum. Dómurinn var skilorðsbundinn með hliðsjón af sakaferli piltsins og ungum aldri.

Fjórði maðurinn sem var ákærður var sýknaður í málinu.

Anton lýsti því í héraðsdómi að um handrukkun hefð verið að ræða þar sem maðurinn sem hann stakk hefði stolið af sér amfetamíni og skuldaði honum því tvær milljónir króna.

Fyrir dómi sagði Anton að hann hefði farið í íbúðina þar sem maðurinn dvaldi og þar áttu sér stað rifrildi þeirra á milli sem fóru úr böndunum. Anton sagðist hafa gripið hníf sem hann hafði tekið með sér og stungið manninn. Sagði Anton að það hefði ekki verið ætlun sín þegar hann lagði af stað og hvatvísi hefði ráðið för.

Hann fullyrti að það hefði ekki verið ætlun sín að drepa manninn og taldi ekki líklegt að maðurinn myndi deyja af völdum stungunnar.

Um var að ræða vasahníf með níu til tíu sentímetra löngu blaði.