Subaru smíðar sinn öflugasta WRX 

Líklega er frægasti einstaki bíll Subaru hinn rallhæfi Impreza WRX STI. Hefur hann notið gríðarlegra vinsælda allt frá tilkomu hans árið 1994. Bíllinn hefur orðið sífellt öflugri með árunum og nú má fá grunngerð WRX með 268 hestafla vél og WRX STI með 296 hestöfl til taks.

Það dugar þó ekki til að fagna 30 ára afmæli STI mótorsport deildar Subaru því þar á bæ verða smíðaðir 349 hestafla Impreza WRX STI bílar og verða þeir því öflugustu slíkir bílar sem smíðaðir hafa verið hjá Subaru og fá að auki nafnið Diamond Edition. Bílarnir fá 20 millimetra viðbótar sporvídd, öflugra fjöðrunarkerfi og meiri íburð í innréttingunni.

Það versta er að aðeins verða smíðuð 30 eintök af þessum öflugu bílum og verða þeir allir seldir í S-Afríku þar sem bíllinn var þróaður af S-Afríkudeild Subaru. Með öll þessi hestöfl í farteskinu og fjórhjóladrif Subaru er bíllinn undir 5 sekúndur í hundraðið. Áfram er hámarkshraði bílsins takmarkaður við 255 km/klst. Verðið á þessum öflugustu WRX bílum sögunnar verður 56.000 dollarar, eða um 7 milljónir króna. Til fróðleiks má nefna að STI stendur fyrir Subaru Technica International.