Átta mörk Guðjóns í sigri Ljónanna

Guðjón Valur Sigurðsson fór mikinn í sigri Rhein-Neckar Löwen á Erlangen í Íslendingaslag í þýsku Bundesligunni í handbolta.

Guðjón Valur skoraði átta mörk fyrir Rhein-Neckar sem vann 29-26 sigur. Alexander Petersson gerði þrjú mörk fyrir Ljónin.

Lærisveinar Aðalsteins Eyjólfssonar byrjuðu leikinn betur og voru yfir nær allan fyrri hálfleikinn. Heimamenn náðu hins vegar að jafna og komast yfir, staðan 15-14 í hálfleik.

Saga seinni hálfleiks var svipuð. Erlangen náði að komast yfir nokkuð fljótt í hálfleiknum, hélt forystunni þar til á síðustu tíu mínútunum þegar heimamenn náðu yfirhöndinni og kláruðu leikinn.

Gísli Þorgeir Kristjánsson var í leikmannahópi Kiel sem vann Göppingen 28-26.

Göppingen náði ágætu forskoti í fyrri hálfleik en var bara einu marki yfir í hálfleik 14-15. Seinni hálfleikurinn var jafn framan af þar til Kiel seig fram úr á loka mínútum leiksins og fór að lokum með sigur.