Arnar næstmarkahæstur í jafntefli

Arnar Birkir Hálfdánsson skoraði fimm mörk í jafntefli Sönderjyske í dönsku úrvalsdeildinni í handbolta í kvöld.

Arnar Birkir var næst markahæstur í liði Sönderjyske í 30-30 jafntefli við Bjerringbro-Silkeborg. Aaron Mensing var markahæstur með sex.

Heimamenn í Bjerringbro byrjuðu betur og voru yfir framan af. Þegar flautað var til hálfleiks var staðan 17-15. Seinni hálfleikurinn var mjög jafn og skiptust liðin á að halda forystunni.

Gestirnir í Sönderjyske voru með tveggja marka forystu tveimur mínútum fyrir leikslok en heimamenn náðu að koma til baka og tryggja sér stig í 30-30 jafntefli.