Ungt fólk fær síður niðurgreiðslu á sálfræðiþjónustu

Framkvæmdastjóri Geðhjálpar segir að bjóða eigi ungu fólki fría sálfræðitíma til að aðstoða þau og hjálpa þeim að fóta sig. Þetta sé oft erfitt tímabil í lífi fólks og flókið geti verið að finna tilgang í tilverunni.

„Frá árinu 2013 þegar við byrjum að verða ríkari og ríkari þá hefur geðheilsu ungs fólks farið versnandi samkvæmt könnunum. Að einhverju leyti þá er þetta vitundavarkninginn að fólk er að tala meira um hlutina.“

„En þetta eru raunveruleg hætt umerki. Ég myndi einfaldlega lýsa því þannig að það eru bara rauð blikkandi ljós á móti okkur varðandi geðheilbrigði ungs fólks. Við því þarf að bregðast,” segir Anna Gunnhildur Ólafsdóttir, framkvæmdastjóri Geðhjálpar.

Í fréttum okkar í gær sögðum við frá því að foreldra barna sem eiga við fleiri en einn vanda að stríða upplifa úrræðaleysi í kerfinu. Stofna á samtök sem ætla að koma á fót heildstæðu meðferðarúrræði fyrir ungt fólk í vanda.

Anna segir mikið álag á ungu fólki og foreldrar leiti oft til hennar fullkomlega vanmáttugir og viti ekki hvernig þeir eigi að hjálpa börnunum sínum.

Hún segir fría sálfræðiþjónustu nauðsynlega. „Þetta er erfiður tími í lífi fólks. Það er mikil streita í gangi varðandi hvað þú ætlar að verða og allt þetta.“

„Líka varðandi náin tengsl. Það skiptir máli að hjálpa fólki strax til þess að vandinn verði ekki flóknari. Svo skiptir auðvitað máli að fólk á þessum aldri á ekki réttindi hjá stéttarfélögum og fær ekki niðurgreiðslu hjá stéttarfélögum sínum. Það kostar 14 til 16 þúsund hver tími,” segir hún.