Leikmenn að gera sitt gamla félag gjaldþrota

Danska handboltafélagið KIF Kolding gæti verið á leiðinni í gjaldþrotaskipti og ástæðan er uppgjör félagsins við fyrrum leikmenn.

TV 2 SPORT hefur heimildir fyrir því að Leikmannasamtökin í Danmörku séu fyrir hönd leikmanna að reyna að þvinga KIF Kolding í gjaldþrot. KIF Kolding skuldar starfsfólki sínu laun, bæði leikmönnum sem og öðrum starfsmönnum. Nú er þolinmæðin á þrotum.

Leikmannasamtökin staðfestu við TV 2 að þeir hafi pressað á gjaldþrotaskipti vegna vangoldinna launa.KIF Kolding skuldar leikmönnunum á bilinu eina til eina og hálf milljón danskra króna sem eru um 17 til 25 milljónir íslenskra króna. Þetta er gömul skuld sem félagið náði ekki að gera upp í sumar.

„Leikmannsamtökin berjast fyrir rétti fjögurra fyrrum leikmanna okkar sem vilja allir félaginu vel en okkur hefur gengið illa að gera upp við þá. Ég vil ekki segja meira,“ sagði Brian Stein, stjórnarformaður KIF við TV2.

Einn af leikmönnunum er Bo Spellerberg sem spilaði í sextán ár hjá félaginu. Hinir eru Lars Jørgensen, Marcus Cleverly og Thor Mörk.

Brian Stein býst þó ekki við að KIF Kolding verði gert gjaldþrota vegna þessarar kröfu leikmannana.

„Ég held að það séu mjög litlar líkur á því að KIF Kolding verði gjaldþrota vegna þessa máls,“ sagði Brian Stein og benti nú að málið færi nú bara sína leið í kerfinu. Hann notaði hvert tækifæri til að biðla til umræddra leikmanna og talar líka vel um þá og þeirra góða hugarfar til félagsins.

Íslenski landsliðsmaðurinn Ólafur Gústafsson spilar með liði KIF Kolding og hefur skorað 19 mörk í fyrstu 4 leikjum liðsins á tímabilinu. Aron Kristjánsson gerði félagið líka tvisvar sinnum að dönskum meisturum eða árin 2014 og 2015.

KIF Kolding var í miklum vandræðum með að greiða laun til leikmanna tímabilið 2016 til 2017. Í framhaldinu yfirgáfu margir sterkir leikmenn félagið.

KIF Kolding var komið á svartan lista hjá danska handboltasambandinu yfir félög sem eru í svo slæmri fjárhagstöðu og þau mega ekki gera nýja samninga við leikmenn. KIF Kolding slapp hins vegar af þeim lista í sumar.