Handbolti

Stóð aldrei til að Gísli yrði í stóru hlutverki hjá Kiel á fyrsta ári

Tómas Þór Þórðarson skrifar
Gísli Þorgeir Kristjánsson fór til Kiel eftir tímabilið með FH.
Gísli Þorgeir Kristjánsson fór til Kiel eftir tímabilið með FH. Vísir/Andri Marinó
Gísli Þorgeir Kristjánsson, landsliðsmaður í handbolta, hefur ekkert spilað með þýska stórliðinu Kiel á undirbúningstímabilinu vegna meiðsla á öxl sem að hann varð fyrir í leik á móti ÍBV í úrslitakeppni Olís-deildarinnar síðasta sumar.

Hann mun fá tíma til að ná sér af meiðslunum en Alfreð Gíslason, þjálfari Kiel, segir í viðtali við Morgunblaðið í dag að þar á bæ eru menn ekkert að flýta sér með þennan unga leikstjórnanda.

„Við erum bara með hann í uppbyggingu eftir meiðslin og ætlum ekki að tefla á tvær hættur í þeim efnum heldur gefa okkur og honum þann tíma sem þarf til þess að hann nái fullri heilsu. Gísli Þorgeir er ungur og ekki hægt að taka neina áhættu í þeim efnum,“ segir Alfreð.

Gísli var ofurstjarna í Olís-deildinni á síðustu leiktíð með FH-liðinu sem endaði í 2. sæti eftir tap fyrir ÍBV í úrslitarimmunni. Nú er hann kominn í svakalega samkeppni og stefnir í að hann spili ekki svo mikið á þessu síðasta tímabili Alfreðs með liðið.

Þetta á ekkert að koma á óvart, að sögn Alfreðs, en aldrei stóð til að Gísli yrði í stóru hlutverki hjá liðinu á fyrsta ári. Meiðslin hafi þó vissulega sett strik í reikninginn.

„Gísli Þorgeir hefur ótvíræða hæfileika en þarf að taka sér tíma til þess að koma sér inn í allt hér og æfa almennilega eftir að hafa náð öxlinni í lag áður en hann fer að spila með okkur,“ segir Alfreð Gíslason.




Fleiri fréttir

Sjá meira


×