Skilur ekki alla þessa gagnrýni

Arsenal er stigalaust eftir tvo fyrstu leiki sína í ensku úrvalsdeildinni en þetta voru leikir sem voru jafnframt fyrstu tveir deildarleikirnir síðan að Arsene Wenger hætti eftir rúmlega tveggja áratuga starf.

Þetta er í fyrsta sinn síðan 1992 sem Arsenal tapar tveimur fyrstu leikjum sínum en mótherjarnir voru engu að síður öflug lið  Manchester City og Chelsea.

Arsenal leikmaðurinn Henrikh Mkhitaryan klórar sér í höfðinu yfir allri gagrýninni sem liðið og nýi stjórinn Unai Emery hafa þurft að þola strax í upphafi tímabilsins.

„Ég er minn aðalgagnrýnandi þegar kemur að mínum fótbolta og ég þarf enga auka gagnrýni,“ sagði hinn 29 ára gamli Henrikh Mkhitaryan við BBC Football Focus.

„Ég geri mér fyllilega grein fyrir því hvað ég er að gefa liðinu og hvað það er að gefa mér,“ sagði Mkhitaryan.

Midfielder Henrikh Mkhitaryan tells Football Focus he is not paying "too much attention" to Arsenal's critics. pic.twitter.com/CRC9EKxUlj

— BBC Sport (@BBCSport) August 24, 2018

Henrikh Mkhitaryan skoraði bæði og lagði upp mark í 2-3 tapinu á móti Chelsea í síðustu helgi en þar vann Arsenal upp tveggja marka forystu áður en Chelsea tryggði sér sigurinn í seinni hálfleik.

Hinn 46 ára gamli Unai Emery tók við af Arsene Wenger í sumar en á síðasta tímabili stýrði hann franska stórliðinu Paris Saint Germain.

„Við vorum að fá nýjan knattspyrnustjóra og erum að reyna aðlagast hans fótboltasýn og hans kröfum. Auðvitað hefur þetta verið erfið byrjun en við vorum að mæta tveimur mjög góðum liðum í Manchester City og Chelsea. Það eru samt engir léttir mótherjar í þessari deild,“ sagði Mkhitaryan

„Við töpuðum fyrsta leik og svo öðrum leiknum líka. Svona er fótboltinn. Við verðum að vera áfram jákvæðir og halda áfram okkar góðri vinnu. Þá munu góðu úrslitin detta inn,“ sagði Mkhitaryan

„Ég finn ekki fyrir neinni pressu. Við erum ekki að hugsa eins og eitthvað hafi farið úrskeiðis því við erum að fara í rétta átt þrátt fyrir þessa tvo tapleiki,“ sagði Mkhitaryan.

„Ég skil bara ekki af hverju fólk er að gagnrýna okkar svona mikið. Ég er samt ekki að fylgjast með því enda veit ég hvenær ég hef spilað vel og hvenær ég hef spilað illa,“ sagði Mkhitaryan en það má finna allt viðtalið við hann hér.