Pickford efstur á óskalista Chelsea

Chelsea hefur áhuga á að kaupa Jordan Pickford frá Everton ef Thibaut Courtois verður seldur í sumar. Pickford var aðalmarkvörður Englendinga á HM í Rússlandi í sumar.

Það hefur mikið verið í umræðunni síðustu vikur að Courtois gæti yfirgefið Chelsea. Fjölskylda hans býr á Spáni og leikmaðurinn sjálfur vill fara þangað.

Nýr knattspyrnustjóri Chelsea, Maurizio Sarri, vill hins vegar tala við Belgann áður en ákvörðun verður tekin. Courtois á að snúa til baka úr sumarfríi eftir rúma viku.

Sky Sports greinir frá því í dag að hinn ungi Pickford sé efstur á óskalista Chelsea. Áður höfðu menn eins og Kasper Schmeichel hjá Leicester og Jack Butland hjá Stoke verið nefndir efstir í huga forráðamanna Chelsea en nýjustu heimildir Sky segja Pickford vera efsta nafn á lista.

Pickford varði mark Everton síðasta vetur og dugði frammistaða hans þar til þess að Gareth Southgate valdi hann sem aðalmarkvörð Englendinga á HM í Rússlandi. Þar komst England alla leið í undanúrslit, meðal annars vegna frammistöðu Pickford.

Everton mun hins vegar ekki selja hann svo léttilega. Félagið keypti Pickford frá Sunderland fyrir 30 milljónir punda síðasta sumar og var hann valinn leikmaður ársins hjá Everton, bæði af stuðningsmönnum og liðsfélögunum.