Fyrrum landsliðsþjálfari Argentínu tekinn við Leeds

Leeds United hefur gengið frá ráðningu á nýjum knattspyrnustjóra. Argentínumaðurinn Marcelo Bielsa hefur verið ráðinn og gerir hann tveggja ára samning við enska B-deildarliðið, með möguleika á framlengingu.

Hinn 62 ára gamli Bielsa er þrautreyndur knattspyrnustjóri en þjálfaraferill hans hófst hjá Newell´s Old Boys í heimalandinu árið 1990.

Hann stýrði argentínska landsliðinu í sex ár eða frá 1998-2004 og stýrði svo Síle frá 2007-2011. Í kjölfarið tók hann við Athletic Bilbao þar sem hann var við stjórnvölin tvö tímabil. Hann hefur einnig stýrt Marseille og nú síðast Lille en í millitíðinni var hann stjóri Lazio; en aðeins í tvo daga.

„Það hefur alltaf verið mitt markmið að starfa í Englandi og ég hef nokkrum sinnum fengið tilboð þaðan á mínum ferli. Ég hef beðið eftir rétta tækifærinu og þegar félag með sögu á boð við Leeds hefur samband er ómögulegt að hafna því,“ segir Bielsa.

Leeds hafnaði í 13.sæti ensku B-deildarinnar á nýafstaðinni leiktíð en er sögufrægt félag í enskri knattspyrnu.