Viðskipti innlent

Icelandair hótel kaupa Hótel Öldu við Laugaveg

Sylvía Rut Sigfúsdóttir skrifar
Magnea Þórey Hjálmarsdóttir, framkvæmdastjóri Icelandair Hotels.
Magnea Þórey Hjálmarsdóttir, framkvæmdastjóri Icelandair Hotels. Vísir/Pjetur
Icelandair hótel hafa gengið frá kaupum á Hótel Öldu við Laugaveg. Samkvæmt tilkynningu frá Icelandair verður Hótel Alda verður rekið áfram undir sama nafni. Eftir kaupin á Hótel Öldu eru hótelin í rekstri Icelandair hótela þrettán talsins.

„Hótel Alda er spennandi viðbót við hótelstarfsemi okkar í höfuðborginni og með auknu umfangi náum við fram enn frekari hagkvæmni í rekstri félagsins. Við höfum mikla trú á Reykjavík sem áfangastað og kaupin eru liður í þeirri stefnu okkar að reka hágæða hótel í frábærri borg. Miðbær Reykjavíkur er lang fjölmennasti ferðamannastaður landsins og við viljum taka þátt í að þróa borgina sem áfangastað og byggja upp gistimöguleika fyrir ferðamenn sem sækjast eftir gæðaupplifun,“ segir Magnea Þ. Hjálmarsdóttir, framkvæmdastjóri Icelandair hótela.

Hótel Alda tók til starfa vorið 2014. Á hótelinu eru 89 herbergi. Húsnæði hótelsins hefur á undanförnum árum verið algjörlega endurnýjað að innan sem utan. Eftir kaupin á Hótel Öldu mun herbergjafjöldi Icelandair hótela alls telja 1.937 herbergi um land allt, 876 í Reykjavík og 450 herbergi á landsbyggðinni í rekstri allt árið en þar að auki 611 Eddu hótelherbergi í sumar rekstri.


Tengdar fréttir

Nýtt hótel, veitingastaðir og íbúðir rísa á einu ári við Austurvöll

Lítil prýði hefur verið af gömlu höfuðstöðvum Landsímans við Austurvöll á undanförnum árum. En nú eru horfur á að framkvæmdir fari að hefjast á reitnum á næstu vikum þrátt fyrir kæru sóknarnefndar Dómkirkjunnar á deiliskipulagi borgarinnar á svæðinu til úrskurðarnefndar umhverfis- og auðlindarmála.






Fleiri fréttir

Sjá meira


×