Gummi Gumm velur fyrsta hópinn: Koma ferskir vindar inn í íslenska landsliðið í dag?

Guðmundur Guðmundsson, nýráðinn landsliðsþjálfari, tilkynnir í dag fyrsta landsliðshóp sinn eftir að hann tók aftur við karlalandsliðinu í handbolta. Framundan er sterkt æfingamót í Noregi. Margir bíða spenntir eftir því hversu miklar breytingar Guðmundur gerir á hópnum.

Geir Sveinsson hefur þjálfað íslenska landsliðið undanfarin tvö ár og þar á undan var Aron Kristjánsson með liðið í fjögur ár. Hópurinn í dag verður fyrsti landsliðshópur Guðmundar síðan að hann valdi lokahóp sinn á Ólympíuleikunum í London 2012.

Liðið sem Guðmundur valdi fyrir að verða sex árum var skipað reynsluboltum í hverri stöðu og leikmönnum sem Guðmundur þekkti mjög vel eftir fjögur ár samfellt með liðið. Nú er staðan hinsvegar allt önnur og flestir lykilmanna liðsins frá því í London 2012 hafa sett landsliðsskóna og jafnvel handboltaskóna sína upp á hillu.

Guðmundur talaði um að horfa til framtíðar þegar hann var ráðinn sem þjálfari liðsins og sagðist þá alveg tilbúinn að fara í uppbyggingarstarf með liðið. Það hlýtur að þýða að hann ætli að skoða yngri framtíðarleikmenn liðsins.

Geir Sveinsson var búinn að kom kynslóðarskiptunum af stað þótt að hann hafi ekki gengið nógu langt í því að mati margra. Nokkrir ungir framtíðarleikmenn fengu engu að síður að stíga inn á stóra sviðið á síðustu tveimur stórmótum hjá Geir.

Vísir hefur aðeins skoðað yfir sviðið og velt því fyrir sér hvað Guðmundur muni gera með hópinn sinn að þessu sinni. Hér á eftir skoðum við spurningarnar sem brenna á mörgum fyrir fundinn í dag.

Blaðamannfundur Guðmundar Guðmundssonar hefst klukkan 14.00 og verður í beinni útsendingu á Vísi.

Línumennirnir og þá sérstaklega Vignir Svavarsson

Vignir Svavarsson var í frystikistunni hjá Geir Sveinssyni og þótt mörgum það skrýtið. Hann er að spila stórt hlutverk hjá sínu liði í Danmörku og var oftast með þegar Guðmundur réði ríkjum síðasta hjá íslenska landsliðinu. Hann hefur orðið bikarmeistari með Team-Tvis Holstebro tvisvar á síðustu þremur árum og spilaði síðast í Meistaradeildinni í fyrra.

Það var hins vegar enginn Arnar Freyr Arnarsson í boði þegar Guðmundur valdi síðasta hópinn sinn fyrir sex árum. Kári Kristján Kristjánsson hefur verið í liðinu að undanförnu en spilar bara sókn. Hér heima hafa margir kallað eftir því að Ágúst Birgisson fái tækifæri og svo má nú ekki gleyma Þráni Orra Jónssyni sem spilar með Elverum í norsku deildinni.

Björgvin Páll og ....

Björgvin Páll Gústavsson er besti markvörður landsins og verður pottþétt í liðinu. Það var nú Guðmundur sem tók á sínum tíma þá góðu ákvörðun að taka hann inn í liðið fyrir silfur Ólympíuleikanna í Peking 2008. En hver verður með honum? Ágúst Elí Björgvinsson var í EM-hópnum en hefur ekki verið alltof sannfærandi eftir EM.

Guðmundur gæti því farið aftur í reynslumeiri menn eins og Aron Rafn Eðvarðsson eða jafnvel kallað á Hreiðar Levý Guðmundsson aftur. Hann gæti líka gengið alla leið og kallað á framtíðarmarkvörð íslenska liðsins sem langflestir eru sammála um að verði Framarinn Viktor Gísli Hallgrímsson. Viktor Gísli sýndi það í undanúrslitaleik bikarsins að þar fer maður sem getur ráðið úrslitum í leikjum.

Guðjón Valur Sigurðsson og vinstra hornið

Fyrirliði íslenska landsliðsins undanfarin ár, og sá sem hefur verið upptekinn við að breyta markameti íslenska landsliðsins í heimsmet, er hinn 38 ára gamli Guðjón Valur Sigurðsson. Guðjón Valur var fastamaður í liði Guðmundar á árum áður og hefur haldið öðrum mönnum frá vinstri hornastöðunni í að vera tvo áratugi.

Það styttist í endalokin en er komið að þeim núna? Mun þá Guðmundur nýta sér frábæra breidd íslenska handboltans í vinstra horninu? Bjarki Már Elísson og Stefán Rafn Sigurmannsson eru báðir að spila meðal þeirra bestu í boltanum og hungraðir í alvöru tækifæri. Guðjón Valur hefur hins vegar lítið gefið eftir. Hann er enn í hópi bestu vinstri hornamanna heims og í einu besta lið heims.

Hægra hornið

Arnór Þór Gunnarsson hefur verið maðurinn í hægra horninu síðustu ár og fáir aðrir komist að. Helsta samkeppnin hefur komið frá fjölhæfum hægri skyttum sem hafa fengið að detta við og við niður í hornið.

Guðmundur gæti hér kallað á nýkrýndan bikarmeistara úr Eyjum, Theodór Sigurbjörnsson, sem hefur farið mikinn í Olís-deildinni síðustu ár en fengið fá tækifæri með landsliðinu. Annar ungur framtíðarmaður í hægra horninu gæti síðan verið Sigvaldi Björn Guðjónsson.

Selfossþrenna, tvenna eða hvað gerir hann með ungu strákana hans Patta

Selfoss-liðið hefur staðið sig frábærlega í Olís-deildinni í vetur og það með yngstu útilínu deildarinnar. Haukur Þrastason, Teitur Örn Einarsson og Elvar Örn Jónsson hafa sýnt að þar eru frábærir leikmenn á ferðinni og allt leikmenn sem verða pottþétt landsliðsmenn í nánustu framtíð. Er þeirri tími runninn upp strax?

Sextán ára í landsliðið

Haukur Þrastason er hins vegar enn bara sextán ára gamall og því enn löglegur í mörg yngri landslið. Timi hans kemur en er hann kominn strax í dag? Miðað við frábæra frammistöðu hans í Olís-deildinni er augljósa svarið við því já. Það hversu góður varnarmaður hann er í dag ætti að sannfæra alla þjálfara á augabragði.

Alexander Petersson

Alexander Petersson hefur ekki spilað með íslenska landsliðnu síðustu ár en hann er á fullu með Rhein Neckar Löwen eins og Guðjón Valur Sigurðsson. Alexander var alltaf í stóru hlutverki hjá Guðmundi og einhverjir hafa ýjað að því að Guðmundur muni tékka á Alex og jafnvel plata hann aftur í landsliðið. Við seljum það þó ekki dýrara en við keyptum það.

Varnarleikurinn

Það vita flestir hvaða vörn Guðmundur Guðmundsson vill spila og því ættum við að leita að Sverre (Andreas Jakobsson) og Ingimundar (Ingimundarson) týpum. Geir Sveinsson var svo sem að gera ágæta hluti með varnarleikinn og talaði sjálfur um að við höfum verið með eitt besta varnarliðið á HM 2017.

Það stóðu samt menn fyrir utan liðið sem margir vildu sjá. Menn eins og Vignir Svavarsson sem dæmi. Hver verður kletturinn og hver verður vinnudýrið? Guðmundur þarf að byrja snemma að þróa nýtt teymi og því svarar hann því eflaust mörgum spurningum með vali sínu í dag.

Vignir, nú eða Tandri Már Konráðsson sem spilar lykilhlutverk í vörn Skjern sem er komið í 16 liða úrslit Meistaradeildarinnar, gætu verið kletturinn í vörninni en þá vantar Guðmundi þessa fótfráu týpu fyrir framan. Fær Haukur Þrastarson sénsinn með sinn afburðar leikskilning? heldur þróunin áfram á Ými Erni Gíslasyni eða fær jafnvel Alexander Örn Júlíusson sénsinn sem er einn sá allra besti hér heima að koma út úr vörninni eins og Diddi gerði forðum daga.

Sögusagnirnir um Ólafur Gústafsson og Stefán Rafn Sigurmannsson

Ólafur Gústafsson og Stefán Rafn Sigurmannsson voru út í kuldanum hjá Geir og þótti mörgum það miður. Báðir ættu þeir að eiga mörg góð ár eftir í boltanum og báðir eru þeir öflugir varnarmenn. Það fóru strax sögusagnir í gang um að þeir kæmu strax inn í liðið hjá Guðmundi en hvað í raun gerist þar kemur í ljós í dag.