Helgi Björns heldur stórtónleika í Laugardalshöll

Helgi Björnsson verður 60 ára þann 10. júlí næstkomandi og af því tilefni ætlar þessi ástsæli söngvari að blása til glæsilegra stórtónleika í Laugardalshöllinni laugardaginn 8. september.

Þetta kemur fram í tilkynningu frá Senu Live en á tónleikunum mun Helgi fara yfir allan ferilinn dyggilega studdur af húsbandi skipuðum færustu hljóðfæraleikurum landsins, bakröddum og góðum gestum.

Í tilkynningunni segir að ekkert verði til sparað og er markmiðið að tónleikarnir verði sem eftirminnilegastir.

Miðasalan fer af stað innan tíðar. Sjálfur segir Helgi að hann muni frumflytja nýtt lag á næstunni.

Hér að neðan má hlusta á brot úr nýja laginu frá Holy B.