Gerry McGovern hjá Land Rover er hönnuður ársins

Yfirhönnuður Land Rover, Gerry McGovern, var fyrir skömmu heiðraður á alþjóðlegu hönnunarhátíð bílaframleiðenda og hlaut hönnunarverðlaunin „Grand Prix du Design“ sem afhent voru í París. Hann hlaut verðlaunin fyrir framlag sitt og áhrif á þróun hins alþjóðlega bílaiðnaðar og þá ekki síst fyrir nýjan Range Rover Velar sem formaður hátíðarinnar segir að sé framúrskarandi listaverk.

Verðlaunin voru ákveðin af dómnefnd fulltrúa fimmtán aðila á sviði bílaiðnðarins, íþrótta, arkitektúrs, tísku, hönnunar, menningarmála og fjölmiðla. Við afhendinguna sagði Rémi Depoix, formaður „Festival Automobile International“ að Gerry​ McGovern​ hljóti verðlaunin í ár fyrir „hið undurfallega listaverk sitt, Range Rover Velar, og í raun fyrir starfsferil sinn allan og framlag sitt til greinarinnar.

Eitt helsta afrek hans er hvernig tekist hefur að yfirfæra helstu séreinkenni Land Rover yfir á nýjar og breyttar kynslóðir bíla fyrirtækisins, sem birtist fyrst með Range Rover Evoque, og varðveita þau í senn. Breskur bílaiðnaður hefur gengið í endurnýjun lífdaga sinna vegna hugsjónar og framtíðarsýnar Gerry McGovern og á grundvelli stórkostlegrar arfleifðar Land Rover sem bílamerkis,“ sagði Depoix við afhendinguna.

Við móttöku þeirra sagði McGovern að verðlaunin væru mikil viðurkenning á mikilvægi hönnunar sem blasi hvarvetna við á öllum sviðum mannlegs lífs. „Við hjá Land Rover vinnum þrotlaust að því að hanna eftirsóttustu bílana á markaðnum, bílana sem viðskiptavinir okkar elska að eilífu.“ Range Rover Velar er fjórða bílgerð Range Rover og sú sem brúar bilið milli Evoque og Range Rover Sport. Frá og með 2020 verða allir nýir bílar Jaguar Land Rover einnig með rafmótor sem tengiltvinnbílar. Range Rover og Range Rover Sport eru nú þegar fáanlegir sem slíkir.