Óvissa ríkir um afnám vasapeningakerfis

Starfshópur um afnám vasapeninga hefur fundað sextán sinnum frá því að hann var skipaður í maí 2016 af þáverandi ráðherra, Eygló Harðardóttur. Hann hefur ekki skilað skýrslu eða öðrum beinum afurðum vinnu sinnar.

Starfshópnum var falið að útfæra og koma á tilraunaverkefni í samvinnu við eitt eða fleiri hjúkrunarheimili um nýtt fyrirkomulag um greiðsluþátttöku íbúa á dvalar- og hjúkrunarheimilum.

Hópurinn er skipaður fulltrúum frá Landssambandi eldri borgara, Sambandi íslenskra sveitarfélaga, Samtökum fyrirtækja í vel­ferðar­þjónustu, Trygginga­stofnun ríkisins, Sjúkratryggingum Íslands og þremur fulltrúum frá vel­ferðar­ráðu­neytinu.

Í svari frá velferðarráðuneytinu um afrakstur starfshópsins kemur fram að tilraunaverkefni um afnám vasapeningakerfis sé enn á undirbúningsstigi. „Haustið 2016 fundaði starfshópurinn með forstöðumönnum tveggja hjúkrunarheimila sem lýst höfðu áhuga á verkefninu, en vegna þess hve langt er um liðið er nauðsynlegt að kanna aftur hvort áhugi á þátttöku sé enn fyrir hendi. Því má segja að ekki liggi afdráttarlaust fyrir hvaða heimili muni taka þátt í tilraunaverkefninu.“

Ásmundur Einar Daðason, félags- og jafnréttismálaráðherra, var ekki tilbúinn til að lýsa sýn sinni á verkefnið þegar spurt var eftir henni í fyrirspurn til ráðuneytisins og því ekki víst um afstöðu hans. „Félags- og jafnréttismálaráðherra er að kynna sér stöðu þessara mála og afla sér þekkingar á verkefninu og mun fjalla um afstöðu sína í svari við fyrirspurn sem beint hefur verið til hans á Alþingi um afnám vasapeningakerfis á dvalar- og hjúkrunarheimilum,“ segir í svari frá ráðuneytinu sem greindi einnig frá því að nýr ráðherra ætlaði sér að svara fyrirspurnum um verkefnið þann 29. janúar næstkomandi.