Guðmundur kominn í úrslit á Asíumótinu

Barein, undir stjórn Guðmundar Guðmundssonar, komst í morgun í úrslit Asíumótsins í handbolta er liðið vann sigur á Sádi Arabíu, 24-22, í undanúrslitaleik.

Staðan í leikhléi var 11-11 en strákarnir hans Guðmundar komu mjög beittir til síðari hálfleiksins og fóru að byggja upp gott forskot.

Er tíu mínútur voru eftir af leiknum var Barein með fimm marka forskot, 20-15. Sádarnir sóttu að Barein á lokamínútunum en strákarnir hans Gumma náðu að halda út.

Barein mætir Katar í úrslitaleiknum en Katar valtaði yfir Suður-Kóreu snemma í morgun.