Tólfti sigur Kiel í röð

Þýska handboltastórveldið Kiel, undir stjórn Alfreðs Gíslasonar, fer með himinskautum í þýsku úrvalsdeildinni í handbolta þessa dagana en liðið vann í dag sinn tólfta sigur í röð þegar liðið heimsótti Hannover Burgdorf.

Staðan var jöfn í leikhléi, 13-13, en í síðari hálfleik tóku gestirnir öll völd á vellinum og unnu að lokum sjö marka sigur, 25-32. 

Steffen Weinhold, Niclas Ekberg og Domagoj Duvnjak skoruðu sex mörk hver fyrir Kiel en Gísli Þorgeir Kristjánsson var ekki í leikmannahópi Kiel að þessu sinni.

Kiel hefur aðeins tapað tveimur leikjum í deildinni í vetur, í 3. og 4.umferð en liðið er í 2.sæti deildarinnar á eftir Flensburg sem hefur fullt hús stiga.