Erlent

Starfsmannastjóri Trump í handalögmálum í Kína vegna kjarnorkufótboltans

Samúel Karl Ólason skrifar
Xi Jinping og Donald Trump í Peking í fyrra. Fregnir hafa borist af því að mögulega munu þeir hittast aftur í næsta mánuði.
Xi Jinping og Donald Trump í Peking í fyrra. Fregnir hafa borist af því að mögulega munu þeir hittast aftur í næsta mánuði. AP/Andy Wong
John Kelly, starfsmannastjóri Hvíta hússins, lenti í handalögmálum við kínverskan öryggisvörð í Kína í fyrra. Það var vegna deilna um kjarnorkufótboltann svokallaða. Fótboltinn er tölva sem er ávallt höfð nálægt forsetanum þar sem hún stýrir öllum kjarnorkuvopnum Bandaríkjanna.

Atvikið átti sér stað í nóvember í fyrra þegar Trump var í opinberri heimsókn í Kína. Kínverskir öryggisverðir meinuðu hermanninum sem ber fótboltann, og öðrum í hópnum, aðgang að hátíðarsal sem Trump og Xi Jinping, forseti Kína, voru í. Kelly var sagt frá atvikinu og stökk hann til og sagði mönnunum að ganga inn í salinn.

Þá greip einn öryggisvörður í Kelly og sá var snúinn í jörðina af einum af lífvörðum Trump.

Sagt var frá þessu atviki á vef Axios í gær en lífvarðasveit Hvíta hússins, sem á ensku nefnist Secret Service, gaf út tilkynningu vegna fréttarinnar og sagði að til smávægilegra handalögmála hefði komið. Hins vegar hafi enginn endað í jörðinni og atvikið hafi staðið stutt.

Frá því að Trump tók við embætti hefur eitt af markmiðum ríkisstjórnar hans verið að sporna gegn áhrifum Kína og njósnaaðgerðum Kína í Bandaríkjunum svo eitthvað sé nefnt. Hins vegar hafi vendingar í Norður-Kóreu tafið aðgerðir gagnvart Kína, þar sem þörf var á samstarfi þeirra til að draga Norður-Kóreu að samningaborðinu.

Til marks um það má benda á nýja varnarstefnu Bandaríkjanna sem opinberuð var í byrjun ársins. Þar kom fram að hryðjuverkastarfsemi væri ekki lengur í forgangi herafla Bandaríkjanna. Þess í stað væri kapp ríkja um áhrif í heiminum í forgangi og stendur til að leggja mikla áherslu á að sporna gegn áhrifum Kína og Rússlands.

Sjá einnig: Snúa sér að Kína og Rússlandi



Wall Street Journal segir útlit fyrir nýtt kalt stríð á milli Bandaríkjanna og Kína.



Bandaríkin hafa lengi gagnrýnt yfirvöld Kína harðlega fyrir njósnir þeirra í Bandaríkjunum, sem hafa að miklu leyti snúið að hernaðartækni og viðskiptum. Meðlimir ríkisstjórnar Trump segja Kína hafa um árabil unnið að því að grafa undan Bandaríkjunum.

Ríkin eiga nú í umfangsmikilli viðskiptadeilu og þá hafa Bandaríkin beitt Kínverja viðskiptaþvingunum að undanförnu. Þá búast bandarískir embættismenn við því að enn frekar verði gefið í gegn Kína. Eitt sem WSJ segir að komi til greina að gera er að refsa fyrirtækjum sem komu með nokkrum hætti að aðgerðum Kína í Suður-Kínahafi.

Árið 1979, þegar opinber samskipti ríkjanna hófust töldu forsvarsmenn Bandaríkjanna að með tímanum myndu yfirvöld Kína mildast og ríkið myndi færast nær lýðræði. Samkvæmt WSJ er telur ríkisstjórn Bandaríkjanna að Kína hafi tekið stórt skref afturábak þegar Xi Jinping komst til valda árið 2012. Hann hefur nú tryggt völd sín verulega í sessi, aukið miðstýringu bæði stjórnmála og efnahags ríkisins og heitið því að gera Kína að ofurveldi.

Haukar í horni

Meðal þeirra innan ríkisstjórnar Trump sem ganga hvað harðast fram gegn Kína eru Kelly og mun atvikið í nóvember ekki hafa fallið vel í kramið. Samkvæmt WSJ sagði Kelly við samstarfsmenn sína í kjölfarið að hann myndi ekki samþykkja afsökunarbeiðni frá yfirvöldum Kína. Ekki nema háttsettur kínverskur embættismaður kæmi til Bandaríkjanna og bæði afsökunar undir fána ríkisins.

Aðrir starfsmenn ríkisstjórnarinnar sem eru á móti Kína eru þeir John Bolton, þjóðaröryggisráðgjafi, og Peter Navarro, viðskiptaráðgjafi. Navarro hefur að undanförnu verið að dreifa bókinni Hundrað ára maraþon: Leyniáætlun Kína um að leysa Bandaríkin af hólmi sem ofurveldi heimsins, um Hvíta húsið að undanförnu.

Þá má benda á Steve Bannon, sem var einn helsti ráðgjafi Trump í byrjun forsetatíðar hans. Hann hefur sagt opinberlega að hann telji að næsta stríð Bandaríkjanna verði við Kína og í sumar hélt hann því fram að í raun væru ríkin í stríði nú þegar.

James Mattis, varnarmálaráðherra Bandaríkjanna, ferðaðist til Kína í síðasta mánuði og fundaði með embættismönnum þar. Það varð hins vegar ekkert úr fundinum þar sem embættismönnum ríkjanna tókst ekki að vera sammála um hver markmið fundarins ættu að vera. Þá var kínverskum tundurspilli siglt í veg bandarísks herskips í Suður-Kínahafi.

Sjá einnig: Þvinguðu bandarískt herskip af leið



Kína hefur gert ólöglegt tilkall til nánast alls Suður-Kínahafs og hafa byggt upp heilu eyjarnar og komið þar fyrir vopnum, flotastöðvum, flugvöllum og öðrum mannvirkjum.

Undirbúa sig fyrir hernað milli ríkja

Fjölmiðillinn Defense One, sagði frá því á dögunum að æfingar herafla Bandaríkjanna í Kyrrahafinu hefðu gerbreyst frá því að Trump tók við embætti. Áður fyrr hefðu æfingarnar að mestu snúist um viðbrögð við ýmsum hamförum og að þjálfa herafla bandamanna Bandaríkjanna.



Nú er búið að skipta um gír. Nú snúist æfingarnar að miklu leyti um það að auka samstarf hermanna með bandamönnum Bandaríkjanna og sameiginlegar árásir.

Þetta á ekki bara við herafla Bandaríkjanna í Kyrrahafinu, heldur um heim allan. Áherslan er ekki lengur á við umfangslitlar aðgerðir gegn hryðjuverkasamtökum. Undanfarið hafa Bandaríkin verið að æfa hernað á milli ríkja í meira mæli.


Tengdar fréttir

Kínverjar hökkuðu sig inn í viðkvæm gögn bandaríska sjóhersins

Tölvuþrjótar á vegum kínverskra yfirvalda brutu sér leið inn í tölvur verktaka á vegum bandaríska sjóhersins. Þar komust þeir yfir viðkvæm gögn sem tengjast kafbátahernaði sjóhersins, þar á meðal áætlunum um nýja tegund flugskeyta sem ætlaðar eru kafbátum.

Blása á gagnrýni um efnahagslega nýlendustefnu

Xi Jinping, forseti Kína, sagði leiðtogum Afríkuríkja í dag að 60 milljarða dala fjárfestingum Kínverja í heimsálfunni sé ekki ætlað að koma niður á fátækum ríkjum Afríku.

Kínverjar gefi ekki þumlung af eyjunum

Forseti Kína segir að þjóð sín sé staðráðin í að tryggja frið í heiminum - þó svo að hún muni ekki gefa eftir tommu af landsvæði sínu til að ná því markmiði.




Fleiri fréttir

Sjá meira


×