Heillandi Maríutásur undanfari rigningar á morgun

Veðrið á höfuðborgarsvæðinu var einstaklega fallegt í dag, heiðskírt og ágætlega hlýtt, en þegar kvölda tók blasti við borgarbúum ljósar samfelldar skýjaslæður þar sem sást í himinn á stöku stað.

Var þarna um að ræða Maríutásur sem margir dáðust að og birti fjöldi myndir af þeim á samfélagsmiðlum í kvöld.

Þessar Maríutásur náðu að heilla marga en veðurfræðingur hjá Veðurstofu Íslands sagði í samtali við Vísi að þær eigi það til að vera undanfari rigningar. Það var einmitt tilfellið með þessar tásur í kvöld, því þær mynduðust í vestri og fylgdu skilum sem nálgast landið.

Nú undir miðnætti var blika yfir höfuðborgarsvæðinu, aflangur gulhvítur skýjabakki, sem er sannarlega undanfarni úrkomu sem verður yfir landinu á morgun.

Veðurfræðingur hjá Veðurstofu Íslands sagði í samtali við Vísi að lægð úr Grænlandshafi muni færa regnsvæði til landsins í fyrramálið og mun rigna hressilega fram að kvöldi víða um land.

Veðurhorfur á landinu næstu daga:

Á morgun:

Fer að rigna í fyrramálið, en hægari og þurrt A-til fram á kvöld. Hiti 10 til 18 stig að deginum, hlýjast NA-lands.

Á laugardag:

Suðvestlæg átt, víða 3-8 m/s, en norðlægari á Vestfjörðum. Víða dálítil væta, en þurrt eystra. Hiti 8 til 17 stig, hlýjast A-lands.

Á sunnudag:

Norðlæg átt, 3-10 m/s, en vestlægari syðst. Væta í flestum landshlutum, en þurrt SA-til. Hiti 6 til 16 stig, hlýjast á SA-landi.

Á mánudag:

Norðlæg átt og rigning eða súld á N-verðu landinu, en breytileg átt og stöku skúrir syðra. Kólnandi veður.

Á þriðjudag og miðvikudag:

Austlæg eða breytileg átt, væta með köflum og hiti yfirleitt 8 til 13 stig að deginum.

Á fimmtudag:

Austlægar átt, stöku skúrir og hlýnar heldur.