Segja Braga ekki hafa farið út fyrir verksvið sitt

Velferðarráðuneytið segir misbresti hafa verið í málsmeðferð ráðuneytisins í máli Braga Guðbrandssonar, fyrrverandi forstjóri Barnaverndarstofu. Hann hafi ekki farið út fyrir verksvið sitt í barnaverndarmáli í Hafnarfirði sem fjallað var mikið um fyrr á árinu. Í bréfi ráðuneytisins til Braga vegna endurupptöku málsins segir enn fremur að upplýsingagjöf hans til föðurafa barns í málinu sem um ræðir hafi ekki gefið tilefni til athugasemda.

Uppruna málsins má rekja til þess að þrjár barnaverndarnefndir á höfuðborgarsvæðinu gagnrýndu vinnubrögð braga og samskipti hans við afann.

Óháð úttekt var svo framkvæmd og var niðurstaða hennar opinberuð í júní. Þar kom fram að það var talið hæpið að ráðuneytið hefði í ljósi þeirra takmörkuðu gagna sem það hafði aflað við meðferð málsins verið í aðstöðu til að fullyrða að forstjórinn hafi farið „út fyrir verksvið sitt“ með því að beina málinu ekki til embættis sýslumannsins á höfuðborgarsvæðinu þegar ljóst varð að um ágreining vegna umgengni væri að ræða.

Sjá einnig: Velferðarráðuneytið brást ekki nógu vel við



Bragi fór í kjölfarið fram á endurupptöku og hefur hún nú verið kláruð. Í áðurnefndu bréfi til Braga segir að ráðuneytið hafi ekki farið að grundvallarreglum stjórnsýsluréttarins um rannsókn mála og andmælarétt.