Valdís Þóra upp um 70 sæti á heimslistanum

Valdís Þóra Jónsdóttir stökk upp um 70 sæti á heimslistanum í golfi eftir frábæra spilamennsku á Ladies Classic Bonville mótinu í Ástralíu um helgina.

Valdís Þóra er nú í sæti 313 en var áður í 383. sæti. Valdís er ein af hástökkvurum listans í þetta sinn og stökk hæst af þeim sem voru í efstu 500 sætunum.

Valdís lenti í þriðja sæti á mótinu í Ástralíu og hoppaði einnig hátt á peningalista Evrópumótaraðarinnar með þeim árangri. Hún verður aftur á ferðinni á Evrópumótaröðinni um komandi helgi þegar hún keppir á NSW Open mótinu sem haldið er á svipuðum stað í Ástralíu.

Ólafía Þórunn Kristinsdóttir færir sig upp um eitt sæti, í 172. sætið.