Liverpool kláraði United í seinni hálfleiknum

Liverpool fór með sigur af hólmi gegn Manchester United í æfingaleik liðanna í Bandaríkjunum í kvöld.

 

Liverpool var með töluvert sterkari byrjunarlið heldur en Manchester United en leikmenn á borð við Salah, Mané, Fabinho og Van Dijk voru allir í byrjunarliðinu.

 

Það voru liðsmenn Liverpool sem byrjuðu leikinn að meiri krafti og sóttu mikið fyrstu mínúturnar án þess þó að skapa sér hættulegt færi.

 

United náði þó nokkrum góðum skyndisóknum og úr einni slíkri skoraði Juan Mata en markið var dæmt af vegna rangstöðu.

 

Fyrsta mark leiksins kom síðan á 28. mínútu en þá var brotið á Mohamed Salah í teig United og fékk Liverpool því vítaspyrnu. Á punktinn steig Sadio Mané sem skoraði af öryggi.

 

Liðsmenn United voru þó ekki lengi að jafna metin því aðeins þremur mínútum seinna skoraði Andreas Pereira glæsilegt mark úr aukaspyrnu og var staðan því 1-1 í hálfleik.

 

Í seinni hálfleiknum dró af liðsmönnum United á meðan Liverpool óx ásmegin. Jurgen Klopp gerið nokkrar breytingar um miðbik hálfleiksins og setti meðal annars Daniel Sturridge inná. Sú breyting skilaði sér í næstu sókn því þá skoraði Sturridge, með sinni fyrstu snertinu, eftir undirbúning Xherdan Shaqiri og kom Liverpool yfir á ný.

 

Tíu mínútum seinna fékk Liverpool aðra vítaspyrnu þegar Herrera braut á Andy Robertson í teignum. Að þessu sinni var það Sheyi Ojo sem steig á punktinn og skoraði hann einnig af öryggi.

 

Liðsmenn Liverpool voru þó ekki hættir því nokkrum mínútum seinna var það Xherdan Shaqiri sem skoraði stórglæsilegt mark. Þá fékk hann frábæra sendingu inná teig og tók hann hjólhestaspyrnu og smell hitti boltann sem söng í netinu.

 

Þetta reyndist lokamark leiksins og lokatölur því 4-1.