Kahn sér eftir því að hafa ekki farið til United

Oliver Kahn sér eftir því að hafa ekki farið til Manchester United þegar hann fékk tækifæri til þess.

Sir Alex Ferguson reyndi að fá þýska markvörðinn til United í upphafi þessarar aldar en hann ákvað að halda kyrru fyrir hjá Bayern München.

„Ferguson er enn fúll út í mig. Hann var sannfærður að ég myndi koma til United árið 2003 eða 2004,“ sagði Kahn í samtali við Sport Bild.

„Þegar ég horfi til baka hefði ég átt að fara. Það hefði verið síðasta stóra áskorunin á ferlinum.“

Kahn spilaði með Bayern síðustu 14 ár ferilsins. Hann varð átta sinnum þýskur meistari með liðinu, sex sinnum bikarmeistari og vann bæði Meistaradeild Evrópu og UEFA-bikarinn.