Hjólaði um 5.000 kílómetra í fyrra

Árni Stefánsson, forstjóri Húsasmiðjunnar, er 43 ára viðskiptafræðingur með MBA frá Háskólanum í Reykjavík. Hann var áður framkvæmdastjóri Bílanausts, framkvæmdastjóri vöru- og rekstrarsviðs N1 og forstöðumaður markaðs- og rekstrardeildar fyrirtækjasviðs Olíufélagsins Esso. Að auki er hann nýskipaður í stjórn Lífeyrissjóðs verzlunarmanna, er í stjórn Samtaka verslunar og þjónustu (SVÞ) og situr hér fyrir svörum í Svipmynd Markaðarins.

Hvað hefur komið þér mest á óvart það sem af er ári?

Það hefur komið mér á óvart að Donald Trump láti enn eins og hann sé að stýra raunveruleikaþætti þar sem stöðugt þarf að koma með bombur til að halda áhorfstölum uppi. Hér heima hefur veðurblíðan í janúar og febrúar komið mér nokkuð á óvart ásamt því að Seðlabankinn hafi enn ekki lækkað vexti.

Hvaða app notarðu mest?

Ég nota Strava og Spotify líklega mest. Svo kíkir maður öðru hvoru á Facebook eins og Íslendingi sæmir.

Hvað gerir þú í frístundum þínum?

Um daginn fór ég annað árið í röð í Vasaloppet sem er 90 kílómetra skíðaganga og mikil upplifun. Hjóladella er líklega aðaláhugamálið og nokkuð tímafrekt. Við fjölskyldan erum dugleg að fara á skíði eftir vinnu og um helgar. Við ferðuðumst töluvert innanlands þegar strákarnir okkar voru yngri og nú gefast fleiri tækifæri til að fara til útlanda í fríum. Þá er gaman að komast öðru hvoru í stangveiði á sumrin. Ég er líka mikill græjukall og hef gaman af því að stúdera alls kyns „nauðsynlegan“ nútímaóþarfa í frístundum.

Hvernig heldur þú þér í formi?

Hjólreiðar og gönguskíði eru fín leið til þess. Um helgina hjólaði ég 70 kílómetra úti í rokinu og sunnudagsmorguninn byrjaði snemma á 60 kílómetra inniæfingu á smarttrainer. Í fyrra hjólaði ég rúmlega 5.000 km sem er fín brennsla, sérstaklega þar sem ég er 193 cm á hæð og lítið fyrir það að fara hægt. Svo spila ég badminton og fer nokkuð reglulega í ræktina.

Hvernig tónlist hlustar þú á?

Coldplay er í sérstöku uppáhaldi hjá mér og Nýdönsk er í hávegum höfð á heimilinu. Á hjólatrainernum vil ég helst hafa hraðan takt og á þeim lagalistum er alls kyns konfekt frá ekki minni spámönnum en David Guetta, Muse, Pitbull, Flo Rida og Rihönnu.

Ertu í þínu draumastarfi?

Ég er í krefjandi starfi sem kallar á mikið frumkvæði og býður upp á fjölda spennandi verkefna. Ég vinn með frábæru samstarfsfólki og á þess kost að vera töluvert á ferðinni sem er frábært. Þá er starfið vel launað sem er auðvitað viðbótarkostur. Líklega er þetta draumastarf.