Framsókn neitar að greiða reikninga frá í tíð Sigmundar

Framsóknarflokkurinn neitar að greiða Viðari Garðarssyni hjá Forystu ehf. fyrir kynningar- og undirbúningsþjónustu innta af hendi í formannstíð Sigmundar Davíðs Gunnlaugssonar. Langt er frá að um heilt sé gróið milli Framsóknar og Sigmundar og er þetta mál komið fyrir dómstóla.

Einlægur stuðningsmaður Sigmundar Davíðs

Í dag er fyrirtaka í forvitnilegu máli fyrir Héraðsdómi Reykjavíkur en þar stefnir Forysta ehf. Framsóknarflokknum vegna vangoldinna reikninga. Forysta er kynningar- og fjölmiðlafyrirtæki sem hefur starfað fyrir Framsóknarflokkinn en Viðar Garðarsson, fyrirsvarsmaður Forystu er mikill stuðningsmaður Sigmundar Davíðs Gunnlaugssonar formanns Miðflokksins. Hann og fyrirtæki hans hafa meðal annars sett upp stuðningsmannavefi þar sem hans sjónarmiðum er haldið á loft.

Vísir spurði Viðar út í málið en hann sagðist ekki vilja tjá sig að sinni. Málið væri á viðkvæmu stigi.

Eftir því sem næst verður komist snýst þetta mál um vinnu sem Viðar og Forysta inntu af hendi í tíð Sigmundar Davíðs, þá er hann var formaður Framsóknarflokksins. Sú vinna snéri að undirbúningi fyrir kosningar sem samkvæmt öllu óbreyttu áttu að fara fram vor 2017.

Síðan urðu verulegar vendingar ófyrirséðar. Kosningum er flýtt og Sigmundur Davíð í kjölfarið settur af sem formaður í blóðugum formannsslag og Sigurður Ingi Jóhannsson tekur við.

Ekki um heilt gróið

Svo virðist sem Framsóknarflokkurinn líti svo á að hann sé óbundinn af verkefnum sem Sigmundur Davíð lagði upp og að forsendur hafi breyst með svo afgerandi hætti; og að þetta snúi þá meira að Sigmundi Davíð og þá Miðflokki hans fremur en Framsóknarflokknum.

Samkvæmt heimildum Vísis hlaupa reikningar frá Viðari á einhverjum milljónum og snúa meðal annars að einhverjum undirverktökum Forystu ehf.

Málið virðist þannig að einhverju grundvallast á særindum milli fyrrum formanns og svo flokks. Sár milli Framsóknarflokksins og Sigmundar Davíðs Gunnlaugssonar eru djúp og langt í frá gróin. Sem svo gæti sett strik í reikninginn og haft sitt að segja í yfirstandandi stjórnarmyndunarviðræðum.