Hin fjórtán ára gamla Kinga með forystu á Hvaleyrinni

Nýkrýndur Íslandsmeistari í golfi gerir sig líklegan að vinna mót á sínum heimavelli aðra helgina í röð og ung stelpa spilaði betur en allar.

Það er mikil spenna eftir fyrsta keppnisdaginn af alls þremur á Borgunarmótinu á Eimskipsmótaröðinni í golfi þar sem keppt er um Hvaleyrarbikarinn. Mótið er það sjöunda af alls átta á keppnistímabilinu 2016-2017 á Eimskipsmótaröðinni, mótaröð þeirra bestu. Golfsambandið fór yfir stöðuna á heimasíðu sinni.

Fjórir kylfingar eru efstir og jafnir á þremur höggum undir pari vallar eftir fyrsta hringinn í karlaflokki. Þar á meðal nýkrýndur Íslandsmeistari Axel Bóasson úr Keili. Þrír kylfingar úr Keili eru á -3 en Hákon Örn Magnússon úr GR deilir efsta sætinu með Vikari Jónassyni, Helga Snæ Björgvinssyni og Axel.

Alls léku 12 kylfingar undir pari Hvaleyrarvallar í dag og 14 kylfingar í karlaflokki eru á pari eða betra skori. Aðeins 36 keppendur eru með keppnisrétt á þessu móti á Eimskipsmótaröðinni og 18 í kvennaflokki.

Staða efstu kylfinga í karlaflokki eftir 1. hringinn:

1.-4. Hákon Örn Magnússon, GR 68 högg (-3)

1.-4. Vikar Jónasson, GK 68 högg (-3)

1.-4. Axel Bóasson, GK 68 högg (-3)

1.-4. Helgi Snær Björgvinsson, GK 68 (-3)

5.-6.Guðmundur Rúnar Hallgrímsson, GS 69 högg (-2)

5.-6. Daníel Ísak Steinarsson, GK 69 högg (-2)

7.-12. Patrekur Nordquist Ragnarsson, GR 70 högg (-1)

7.-12. Arnór Ingi Finnbjörnsson, GR 70 högg (-1)

7.-12. Gísli Sveinbergsson, GK 70 högg (-1)

7.-12. Ragnar Már Garðarsson, GKG 70 högg (-1)

7.-12. Birgir Björn Magnússon, GK 70 högg (-1)

7.-12. Kristján Þór Einarsson, GM 70 högg (-1)

13. Guðmundur Ágúst Kristjánsson, GR 71 högg (par)

14. Aron Snær Júlíusson, GKG 71 högg (par)

Í kvennaflokki er hin 14 ára gamla Kinga Korpak úr Golflúbbi Suðurnesja með eitt högg í forskot eftir fyrsta hringinn. Karen Guðnadóttir, félagi hennar úr GS, er í öðru sæti og Anna Sólveig Snorradóttir úr GK er þriðja. Þar á eftir koma þrír kylfingar kafnir á 7 höggum yfir pari.

Staða efstu kylfinga í kvennaflokki eftir 1. hringinn.

1. Kinga Korpak, GS 73 högg (+2)

2. Karen Guðnadóttir, GS 74 högg (+3)

3. Anna Sólveig Snorradóttir, GK 75 högg (+4)

4.-6. Gunnhildur Kristjánsdóttir, GK 78 högg (+7)

4.-6. Eva Karen Björnsdóttir, GR 78 högg (+7)

4.-6. Helga Kristín Einarsdóttir, GK 78 högg (+7)