Engir sjúkraflutningamenn eru staðsettir á Ólafsfirði

Bæjarráð Fjallabyggðar hafnaði beiðni Heilbrigðisstofnunar Norðurlands(HSN) um að setja á fót vettvangshóp í Ólafsfirði til að auka viðbragðsflýti í kjölfar þess að HSN ætlar að slá af vakt sjúkraflutningamanna í Ólafsfirði. Bæjaryfirvöld telja þetta vera mál ríkis en ekki sveitarfélaga. Forstjóri HSN segir miður að ekki hafi verið orðið við þeirri beiðni.

HSN ætlar að skerða þjónustu á svæðinu og hafa aðeins sjúkraflutningamenn á Dalvík og á Siglufirði. Við það eru íbúar á svæðinu ósáttir. Til að koma til móts við áhyggjur óskaði HSN eftir aðkomu sveitarfélagsins að því setja upp átta til tólf manna viðbragðssveit.

„Vettvangslið er þannig sett upp að í samstarfi við slökkvilið eða björgunarsveit yrði um tíu manna teymi sem snýr að því að þegar eitthvað brátt kemur upp á séu viðbrögð skjót og lágmarksbúnaður til staðar,“ segir Jón Helgi Björnsson, forstjóri HSN. „Slík teymi eru til dæmis á Kjalarnesi, Kópaskeri og í Mývatnssveit þar sem svolítill tími fer í að koma bíl á staðinn.“

„Þetta verkefni er alfarið á ábyrgð Heilbrigðisstofnunar Norðurlands og því er það HSN að leysa þau verkefni sem tengjast heilbrigðisþjónustu á vegum ríkisvaldsins í Fjallabyggð,“ segir í bókun bæjarráðs Fjallabyggðar sem hvetur forstjóra til að leita annarra leiða svo ekki þurfi að koma til þjónustuskerðingar.

Bjarkey Olsen Gunnarsdóttir, þingmaður VG og Ólafsfirðinga, segir málið grafalvarlegt. „Þetta er á engan hátt málefni sveitarfélagsins. Þessi þjónusta er á herðum ríkisins og það er skylda HSN að koma þessum málum í réttan farveg. Hér er um mjög mikilvægt öryggisatriði að ræða. Bæði eru auknar samgöngur á Tröllaskaga vegna ferðamennsku að vetri og sumri og því mikilvægt að öryggi vegfarenda sé tryggt,“ segir Bjarkey.

Jón Helgi segir að ákvörðun HSN standi óbreytt. „Það er miður að ekki hafi verið fallist á stofnun vettvangshópsins en ekkert við því að gera. Þetta breytir ekki ákvörðun HSN um að sjúkrabílnum verði lagt.“