64 prósent telja BF hafa haft gilda ástæðu

Stjórnmál Tæplega tveir af hverjum þremur, eða 64,3% þeirra sem afstöðu, taka telja að meintur trúnaðarbrestur vegna málsmeðferðar á málum barnaníðinga hafi verið gild ástæða til stjórnarslita. Hins vegar telja 35,7 prósent að það hafi ekki verið gild ástæða til stjórnarslita. Þetta sýna niðurstöður skoðanakönnunar Fréttablaðsins sem gerð var 18. september. Eins og fram hefur komið ákvað stjórn Bjartrar framtíðar að slíta stjórnarsamstarfi við Sjálfstæðisflokkinn og Viðreisn eftir að upplýst hafði verið að Benedikt Sveinsson, faðir Bjarna Benediktssonar forsætisráðherra, hafði skrifað undir umsögn fyrir dæmdan barnaníðing vegna umsóknar um uppreist æru. Sigríður Andersen dómsmálaráðherra upplýsti svo um það opinberlega að hún hefði sagt forsætisráðherra frá tengslunum. Forystumönnum annarra stjórnarflokka var ekki sagt frá því. Hringt var í 1.311 manns þar til náðist í 800 manns samkvæmt lagskiptu úrtaki 1Spurt var: Var meintur trúnaðarbrestur vegna málsmeðferðar á málum barnaníðinganna gild ástæða til stjórnarslita. Alls tóku 79 prósent afstöðu til spurningarinnar, 16 prósent sögðust óákveðnir í afstöðu sinni en 5 prósent svöruðu ekki. Gallup birti líka í gær niðurstöður skoðanakönnunar þar sem spurt var hvort nýliðinir atburðir hefðu gefið tilefni til stjórnarslita. Niðurstaða í þeirri könnun var sú að 62 prósent voru sammála því að atburðirnir hefðu gefið tilefni til stjórnarslita en 32 prósent voru því ósammála. Tæplega 6 prósent sögðust hvorki sammála né ósammála. Könnun Gallup var netkönnun sem gerð var dagana 15. til 19. september. Heildarúrtaksstærð var 1.413 og þátttökuhlutfall var 53,4%. Einstaklingar voru handahófsvaldir úr Viðhorfahópi Gallup. - jhh