Vinna hafin við stofnun stöðugleikasjóðs

Bjarni Benediktsson, forsætisráðherra, hefur skipað hóp sérfræðinga um stofnun stöðugleikasjóðs en í stjórnarsáttmála ríkisstjórnar Sjálfstæðisflokks, Viðreisnar og Bjartrar framtíðar er kveðið á um að slíkur sjóður skuli halda utan um arð af orkuauðlindum í eigu ríkissjóðs, tryggi komandi kynslóðum hlutdeild í ávinningi af sameiginlegum auðlindum auk þess sem sjóðurinn geti verið sveiflujafnandi fyrir efnahagslífið.

Ráðherra kynnti í ræðu sinni á Viðskiptaþingi í dag að hann hefði skipað sérfræðingahópinn en í honum sitja Ingimundur Friðriksson, hagfræðingur, Kristín Haraldsdóttir, lögfræðingur og Erlendur Magnússon, fjárfestir.

Haft er eftir Bjarna í tilkynningu frá forsætisráðuneytinu að það sé ánægjulegt að vinna að stofnun sjóðsins sé nú formlega hafin.

„Við sjáum fyrir okkur að markmið stöðugleikasjóðs verði að byggja upp viðnám til að mæta fjárhagslegum áföllum án þess að það leiði til skuldasöfnunar eða ójafnvægis í hagkerfinu eins og við þekkjum svo vel úr sögunni. Markmiðin lúta því einkum að sveiflujöfnun, varúðarsjónarmiðum og sjálfbærni opinberra fjármála. Horft er til þess að hlutverk slíks stöðugleikasjóðs yrði að byggja upp þjóðhagslegan sparnað með því að taka við og ávaxta fjárhagslegar eignir ríkissjóðs sem til hans eru lagðar og að ráðstafa fjármunum til ríkissjóðs í samræmi við ákvæði laga,“ segir Bjarni.

Í tilkynningu ráðuneytisins segir jafnframt að gert sé ráð fyrir að „fjármögnun stöðugleikasjóðs verði með þeim hætti að til hans verði ráðstafað fjárhagslegum arði ríkisins af orkuauðlindum, eftir atvikum í formi afnotagjalda, arðgreiðslna orkufyrirtækja, verðbréfa tengd orkufyrirtækjunum eða í öðru formi. Þá þarf að meta hvort til sjóðsins yrði lagðar aðrar fjárhagslegar eignir, svo sem fjármunir sem varðveittir eru í gjaldeyrisvaraforða Seðlabanka Íslands samkvæmt sérstöku samkomulagi við bankann.“