Réttarhöld yfir sautján ritstjórum og blaðamönnum tyrkneska blaðsins Cumhuriyet hefjast í dag, en starfsmennirnir eru sakaðir um að hafa ljóstrað upp ríkisleyndarmálum og hafa verið ákærðir fyrir að tilheyra hryðjuverkasamtökum.
Hinir ákærðu voru handteknir í október síðastliðnum og hafa því verið í haldi í níu mánuði samfleytt. Þeir voru handteknir á sama tíma og mörg þúsund aðrir í aðgerðum Erdogan Tyrklandsforseta eftir misheppnaða valdaránstilraun þar í landi.
Cumhuriyet er eitt fárra dagblaða stjórnarandstöðinnar sem gefið er út í Tyrklandi. Vakti handtakan því mikla reiði og voru tyrknesk stjórnvöld sökuð um að brjóta gegn sjálfstæði fjölmiðla.
Réttarhöld yfir sautján tyrkneskum blaðamönnum hefjast í dag
