Ólafía Þórunn kom inn í klúbbhús réttu megin við niðurskurðarlínuna

Ólafía Þórunn Kristinsdóttir lék í dag annan hringinn á LPGA mótinu Marathon Classic á einu höggi undir pari og á ágæta möguleika á því að ná niðurskurðinum.

Ólafía Þórunn er þar með á einu höggi undir pari eftir tvo fyrstu dagana og er réttu megin við niðurskurðarlínuna eins og staðan var þegar hún lauk keppni. Það gæti þó breyst enda eiga margar eftir að klára.

Mótið fer fram í Sylvania í Ohio í Bandaríkjunum en þetta er fjórtánda mótið hjá Ólafíu á tímabilinu á sterkustu mótaröð heims.

Þetta var kaflaskiptur dagur hjá Ólafíu sem byrjaði á því að spila seinni níu holur vallarins. Ólafía fékk á þeim þrjá fugla og var því á þremur höggum undir pari eftir níu holur.  Það hefði skilað henni örugglega í gegnum niðurskurðinn.

Ólafía fékk hinsvegar tvo skolla á seinni níu holunum og endaði því daginn á einu höggi undir pari. Hún þarf því að bíða eftir að allar klári til að vera örugg með að fá að halda áfram leik á þriðja hring mótsins á morgun.