Segir yfirskrift baráttufundar minna á Trump

Oddný Harðardóttir þingkona Samfylkingarinnar og fyrrverandi formaður flokksins, segir yfirskrift á baráttufundi hópsins Endurreisn Verkalýðs-hreyfingarinnar minna á slagorð Donalds Trump Bandaríkjaforseta.

„Yfirskriftin á baráttufundi á 1. maí Við viljum samfélagið okkar aftur! minnir mig óþægilega á Make America great again. Þetta er yfirskriftin á baráttufundi á 1. maí þar sem m.a. formaður VR, Ellen Calmon frá ÖBÍ og Gunnar Smári stofnandi Sósialistaflokksins flytja ræður,“ skrifar Oddný.

Make America great again var slagorð Donalds Trump bandaríkjaforseta í kosningabaráttunni vestanhafs í fyrra. Slagorðið var afar umdeilt, enda var byggin múrs á landamærum Bandaríkjanna og Mexíkó helsta stefnumál Trump, sem og takmörkun á ferðum múslima til landsins. 

Oddný bætir við að hún fagni öllum sem berjast fyrir jöfnuði og réttlæti en að yfirskriftin kalli fram þessi hughrif. 

Dagskrá verkalýðsdagsins í ár er með örlítið öðru móti en undanfarin ár þar sem að tveir kröfufundir fara fram í miðbæ Reykjavíkur. Um hundrað metrar aðskilja sviðin tvö. Aðstandendur síðari fundarins eru allt annað en sáttir með sitjandi verkalýðsforystu.