Viljum vera sem víðast

Merkasta uppgötvun rannsóknastofunnar var líklega árið 2005 þegar í ljós kom að stór hluti íslenskra ungbarna var með járnskort og það kom í ljós að þau börn stóðu sig verr en önnur á þroskaprófum sex ára,“ segir Ingibjörg Gunnarsdóttir, forstöðumaður Rannsóknastofu í næringarfræði og prófessor við HÍ, spurð út í starfsemi stofunnar í tilefni tvítugsafmælis hennar.

Hún segir ráðleggingum til foreldra ungbarna hafa verið breytt, í samstarfi við landlækni og heilsugæslu. Stoðmjólk hafi verið sett á markað, hún hafi komið í stað kúamjólkurinnar sem hafi leyst brjóstamjólkina af hólmi fram að því. „Foreldrar virðast hafa fylgt ráðleggingunum vel því að í rannsókn sem gerð var tíu árum síðar greindist járnskortur varla,“ tekur hún fram.

Næringarástand viðkvæmra hópa, svo sem barnshafandi kvenna, ungra barna, sjúklinga og aldraðra hefur verið helsta viðfangsefni stofunnar frá upphafi fyrir tuttugu árum, að sögn Ingibjargar.



Er eitthvað sérstakt sem brennur á næringarfræðingum núna? „Já, rannsóknir á tengslum og áhrifum næringar á andlega heilsu og geðraskanir. Við höfum séð mjög lága stöðu D-vítamíns og Omega3 fitusýra hjá einstaklingum með byrjandi geðklofa, en hvort tveggja er mikilvægt. Nú erum við í samstarfi við erlenda vísindamenn um hvort hægt sé að hafa áhrif á þunglyndi með næringarmeðferð.

Ingibjörg segir ekkert fjármagn lagt í kannanir á mataræði þjóðarinnar eða mat á næringarástandi hennar. „Það vantar næringarfræðinga í heilsugæsluna,“ segir hún. „Við viljum vera sem víðast í heilbrigðiskerfinu því við teljum að við getum gert gagn þar.“