Fórnun Franken matreidd sem merki um betra siðferði Demókrata

Með því að bola Al Franken frá þinginu vegna ásakana um kynferðislega áreitni vilja Demókratar aðskilja sig greinilega frá Repúblikönum og taka harða stöðu gegn kynferðislegu ofbeldi. Eða í hið minnsta sýna kjósendum þá mynd af flokknum. Fjöldi Demókrata kallaði eftir því að Franken myndi segja af sér, sem hann ætlar að gera á næstu vikum.

Svipaða sögu er að segja af þingmanninum John Conyer sem mun láta af þingmennsku eftir að hafa setið á þingi frá 1965. Hann hefur verið sakaður um að hafa áreitt konur kynferðislega.



Það er liður í markvissri stefnumörkun varðandi ofbeldi og skýrum skilaboðum til kjósenda. Þeir eru tilbúnir til að fórna hagsmunum sínum til þess að ná siðferðislegri stöðu.

Í ræðunni þar sem Franken tilkynnti að hann ætlaði að segja af sér skaut hann föstum skotum að Repúblikönum.



„Ég er að fara, á meðan maður sem hefur montað sig, á upptöku, af sögu hans um kynferðisbrot situr í skrifstofu forseta Bandaríkjanna og maður sem hefur ítrekað sóst eftir ungum stúlkum sækist eftir sæti á þinginu, með fullum stuðningi Repúblikanaflokksins,“ sagði Franken.

Skýr skilaboð

Þetta eru nákvæmlega þau skilaboð sem greinendur telja að Demókratar ætli sér að keyra á í þingkosningunum á næsta ári. Með því vilja þeir meðal annars fá fleiri konur og ungt fólk til að kjósa.

Þingmaðurinn Tim Kaine sagði í gær að afsögn Franken myndi setja ný viðmið fyrir þingmenn.



„Nú er það ljóst að hegðun af þessu tagi, áður en þú tekur við embættinu er eitthvað sem þingið á að taka alvarlega. Það á að ná til allra, hvort sem þeir eru Demókratar eða Repúblikanar.“

Eins og tekið er fram í grein Washington Post er þó með öllu óljóst hvort að vitundarvakningin sem kennd er við #MeToo muni skila sér inn í stjórnmálin og verða sterkari en hollusta kjósenda við stjórnmálaflokka.



Mikilvægur þriðjudagur

Það gæti komið í ljós á þriðjudagskvöldið þegar sérstakar kosningar til öldungadeildarinnar fara fram í Alabama. Þar keppast Repúblikaninn Roy Moore og Demókratinn Doug Jones um þingsæti Jeff Sessions, sem nú er dómsmálaráðherra. Minnst níu konur hafa stigið fram og lýst því hvernig Roy Moore hafi elst við þær þegar hann var á fertugsaldri og þær á táningsaldri. Minnst tvær þeirra segja hann hafa brotið gegn sér. Ein segir hann hafa káfað á sér og önnur segir hann hafa reynt að þvinga hana til munnmaka.

Donald Trump hefur lýst yfir fullum stuðningi sínum við Roy Moore og landsnefnd flokksins ákvað að veita framboði hans fjármuni að nýju. Þingmenn flokksins hafa þar að auki reynt að forðast það að svara spurningum um skoðanir sínar á Moore og segja iðulega að það sé kjósenda í Alamaba að ákveða.

Trump tísti nú fyrir skömmu þar sem hann lýsti enn og aftur yfir stuðningi við Moore. Forsetinn segir að kjör Moore sé nauðsynlegt svo hann geti komið helstu málum sínum í gegnum þingið.

LAST thing the Make America Great Again Agenda needs is a Liberal Democrat in Senate where we have so little margin for victory already. The Pelosi/Schumer Puppet Jones would vote against us 100% of the time. He’s bad on Crime, Life, Border, Vets, Guns & Military. VOTE ROY MOORE!

— Donald J. Trump (@realDonaldTrump) December 8, 2017

Þó gæti það reynst Demókrötum erfitt að ná til Repúblikana með málflutningi þessum. Samkvæmt Politico sýna kannanir að kjósendur Repúblikana telji kynferðisbrot vera vandamál Demókrata. Kjósendur Demókrata telja hins vegar að kynferðisbrot séu vandi allra.



Árangur þessarar stefnu mun koma í ljós í nóvember á næsta ári þegar Bandaríkjamenn ganga til þingkosninga.