Segir Viðreisn og Samfylkinguna keppast um að bera upp á Katrínu óheilindi, blekkingar og lygar

Kolbeinn Óttarsson Proppé segir að forystufólk Viðreisnar og Samfylkingarinnar standi fyrir ósvífnum árásum í garð Katrínar Jakobsdóttur. Þá segir hann að fátt segi meira til um „súbstans“ í fólki en hvernig það tekst á við það þegar hlutirnir fara ekki alveg eftir þeirra höfði.

„Einhvern veginn hélt ég að hin nýju boðuðu stjórnmál gengu út á annað en þær ósvífnu árásir sem þetta fólk stendur nú fyrir í garð Katrínar Jakobsdóttir,“ segir Kolbeinn í færslu á Facebook síðu sinni. „Þau keppast hvert við annað um að bera upp á Katrínu óheilindi, blekkingar og lygar, með því að ýja að – og segja nokkuð hreint út – því að Katrín hafi ekki verið í viðræðum stjórnarandstöðuflokkanna af heilindum, önnur stjórn hafi alltaf verið á teikniborðinu, jafnvel frá því fyrir kosningar, eins og formaður Viðreisnar leyfir sér að segja í dag.”

Fátt sem segir meira um fólk en hvernig það tekst á við það þegar hlutirnir fara ekki alveg eftir þeirra höfði

Jafnframt segir hann að það sé sorglegt að sjá fólk bera upp á Katrínu lygar um óheilindi. „Það er fátt sem segir meira til um súbstans í fólki og flokkum en hvernig það og þeir takast á við það þegar hlutirnir fara ekki alveg eftir þeirra höfði. Og það er einstaklega sorglegt að sjá fólk, sem þess á milli mærir Katrínu í hástert þegar það hentar því, bera upp á hana þessar lygar um óheilindi,“ skrifar þingmaðurinn.

Kolbeinn segir einnig að það væri gott ef fólk gæti litið meira í eigin barm og sett sömu kröfur um heilindi á sjálft sig og það gerir á aðra.