Innlent

Gangandi og hjólandi gert hátt undir höfði í nýrri byggð við Kringlu

Nína Hjördís Þorkelsdóttir skrifar
Vinningshugmynd Kanon arkitekta.
Vinningshugmynd Kanon arkitekta. Mynd/Kanon arkitektar
Tillaga Kanon arkitekta um skipulag Kringlusvæðisins varð hlutskörpust í hugmyndasamkeppni Reykjavíkurborgar og Arkitektafélags Íslands um Kringlusvæðið. Fimm tillögur að skipulagi svæðisins bárust.



Í tilkynningu á vef Reykjavíkurborgar segir að keppendur í hugmyndasamkeppninni voru sérstaklega beðnir um að leggja fram framsæknar skipulagshugmyndir fyrir reitinn með sérstakri áherslu á góða nýtingu svæðisins ásamt fjölbreyttu og aðlaðandi borgarumhverfi sem verði eftirsótt til búsetu og starfa. Þá var sérstaklega minnst á að umhverfið ætti að vera gönguvænt auk þess sem áhersla var lögð á tengsl við biðstöðvar Borgarlínu og almenningsvagna.



Í umsögn dómnefndar segir meðal annars um vinningstillöguna að „unnið sé með einfalda reitaskiptingu sem falli vel að hefðbundnu byggðarmynstri borgarinnar og skapi sterka heild. Borgarlínustöð er staðsett við Kringlumýrarbraut og getur þá bæði þjónað Kringlusvæðinu og Menntaskólanum við Hamrahlíð. Gatnakerfi er vel útfært og býður upp á hefðbundnar borgargötur með rólegri bílaumferð og lífvænlegri þjónustu á jarðhæðum.



Húsareitir eru ferningslaga með rúmgóðum, opnum inngörðum. Gert er ráð fyrir allstóru almenningsrými á miðju svæðisins, sem kallast Kringlustétt. Hamrahlíð er framlengd inn á svæðið og nýr inngangur í Kringluna hafður í öndvegi við enda götunnar. Hús Sjóvár og Hús verslunarinnar eru felld haganlega inn í nýja byggð. Eins konar fortorg sunnan við Borgarleikhúsið gæti lyft húsinu upp í umhverfinu og gert aðkomuna að því skemmtilegri en nú er.“



Íbúðirnar sem reistar verða munu vera um 400 til 600 talsins og geta hýst um það bil 1200 íbúa.





Íbúar geti sinnt daglegum erindum án einkabíls



Í tillögunni er gert ráð fyrir blöndun verslunarbyggðar og íbúðarbyggðar þar sem verslun og þjónusta yrði alla jafna á neðri hæðum en íbúðir á efri hæðum húsa. Þá er gert ráð fyrir stækkun Kringlunnar til norðurs að Miklubraut. Sú stækkun nemur alls 30 þúsund fermetrum.



Leitast er við að bæta aðstæður gangandi og hjólandi vegfarenda og gert verður ráð fyrir að íbúar geti nálgast helstu daglega þjónustu án einkabíls.



Þá er í tillögunni gert ráð fyrir almenningsrýmum sem geta nýst undir margvíslega starfsemi. Eitt þessara rýma, Kringlustéttin, mun bjóða upp á aðstöðu fyrir t.d. útibíó, útileikhús, tónleikahald, útiveitingar, útimarkaði, gosbrunna og skautasvell.



Hægt er að skoða vinningstillöguna í heild sinni hér.

Tengd skjöl




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.