Fötluð stúlka ekki fengið umönnun við hæfi í meira en sex ár

Fötluð 24 ára stúlka, sem þarfnast umönnunar allan sólarhringinn, og foreldrar hennar hafa stefnt Reykjavíkurborg og íslenska ríkinu fyrir að synja stúlkunni um húsnæðisúrræði og fullnægjandi umönnun. Í rúm sex ár hafa foreldrarnir þurft að annast stúlkuna vegna þessa. Aðalmeðferð í málinu fór fram í síðustu viku. Formaður Landssamtakanna Þroskahjálpar segir að um prófmál sé að ræða.

Stúlkan hefur alla sína ævi þurft mikla aðstoð. Í stefnu málsins segir að eftir að hún varð átján ára hafi Reykjavíkurborg neitað að veita henni nauðsynlega þjónustu. Umönnun hennar hafi því lent á foreldrunum. Hefur móðir hennar af þessum sökum þurft að hætta á vinnumarkaði.

„Okkur finnst þetta mál vera ákveðinn prófsteinn á það hvort það sé í raun svo að ábyrgð á þjónustu fatlaðra barna falli alfarið úr gildi við átján ára aldur,“ segir Bryndís Snæbjörnsdóttir, formaður Þroskahjálpar.

„Ef niðurstaðan er sú að ábyrgðin við umönnun er sett algerlega á foreldra við átján ára aldur þá þarf að breyta lagarammanum,“ segir Bryndís.

Auk viðurkenningar á því að ákvörðun borgarinnar hafi verið ólögmæt krefst stúlkan tíu milljóna króna í miskabætur. Foreldrarnir krefjast skaðabóta, tæpra 30 þúsund króna fyrir hvern dag frá því að stúlkan varð átján ára.