Innlent

Minna um glæsilegar norðurljósasýningar næstu ár

Kristín Ólafsdóttir og Sunna Sæmundsdóttir skrifa
Norðurljós eru eftirsótt hjá erlendum ferðamönnum sem koma til Íslands. Virkni þeirra mun ná lágmarki á næstu árum.
Norðurljós eru eftirsótt hjá erlendum ferðamönnum sem koma til Íslands. Virkni þeirra mun ná lágmarki á næstu árum. Vísir/Ernir
Norðurljósavirkni mun ná lágmarki á árunum 2019-2021. Verður þá lítið um dansandi norðurljós sem hafa heillað ferðamenn undanfarin misseri.

Virkni norðurljósanna helst í hendur við virkni sólarinnar, sem gengur í gegnum ellefu ára sveiflur. Sveiflan markar segulvirkni sólarinnar og þegar hún nær lágmarki dregur úr norðurljósum. Þessi lágpunktur nálgast nú á nýjan leik að sögn Sævars Helga Bragasonar, ritstjóra Stjörnufræðivefsins.

Sævar Helgi Bragason.Visir/Eyþór
„Núna og næstu árin fer pínulítið að draga úr, hægt og rólega. Þannig að árið 2019 verður sennilega frekar rólegt, 2020 líka, 2021, en svo ætti virknin að aukast aðeins á ný eftir það og ætti að ná hámarki í virkni sólarinnar 2026, í kringum það leyti, og þau ár þar á eftir, þrjú fjögur ár, ættu að vera rosalega fín norðurljós líka.“

Á þessum tíma verði lítið um tilkomumikil norðurljós.

„Norðurljósin hverfa aldrei alveg af því að sólin er stöðugt að senda frá sér þennan sólvind. Við hins vegar komum til með að fá minna svona litríkar, glæsilegar og dýnamískar sýningar eins og við viljum helst sýna ferðamönnum og viljum helst sjálf sjá.“

Það stefnir þó í góðan norðurljósavetur þetta árið áður en ljósin dofna.

„Veturinn í vetur hefur farið rosalega vel af stað og kemur bara til með að halda áfram að vera mjög fínn. Þannig að ég er bara mjög bjartsýnn fyrir þennan vetur og sömuleiðis þokkalega bjartsýnn fyrir næsta vetur, þótt við ættum kannski að fá örlítið sjaldan svona tignarlegar og glæsilegar sýningar þá,“ segir Sævar Helgi.

Norðurljósin hafa löngum verið eitt af því helsta sem ferðamenn hér á landi óska eftir að sjá í heimsóknum sínum. Í síðasta mánuði myndaðist til að mynda örtröð ferðamanna við Gróttu en norðurljósadans var með besta móti tiltekið kvöld í kjölfar svokallaðs kórónugoss, mikils sólgoss, skömmu áður.


Tengdar fréttir

Ferðamannasprengja í vetur: Koma ekki bara fyrir norðurljósin

Vetrarferðamenn verða tvöfalt fleiri í ár en í fyrra samkvæmt spá Isavia. Áætla má að erlend kortavelta yfir vetrarmánuðina fari yfir fjörutíu milljarða í ár. Bretar eru stærsti einstaki hópurinn. Margir koma bæði að sumri og vetri.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.