Kölluð „Iceland“

Tiffany Joh segir að Ólafía hafi staðið sig vel á sínu fyrsta ári á LPGA-mótaröðinni. Nafnið hennar hafi þó þvælst fyrir kylfingunum.

„Enginn vissi hvernig ætti að bera fram nafnið hennar og því kölluðum við hana bara „Iceland“,“ sagði Joh og hló. „Við spiluðum svo saman á móti um daginn og var það í fyrsta sinn sem við spiluðum saman átján holur. Okkur samdi mjög vel og ég er ánægð með hafa hana á mótaröðinni.“

Sjálf segir Ólafía að sér hafi verið vel tekið, jafnvel betur en hún þorði að vona.

„Ég átti svo sem von á meira keppnisskapi og að allir væru óvinir. Það var það sem ég var búin að heyra. En það er alls ekki þannig. Andrúmsloftið er gott og vinalegt,“ segir Ólafía.