Hægt að sjá ensku liðin æfa á Laugardalsvelli

Miðar á leik Mancheester City og West Ham á föstudag veita aðgang að æfingum liðanna daginn fyrir leik. Þetta kemur fram í fréttatilkynningu frá forsvarsmönnum The Super Match.

Leikurinn fer fram á Laugardalsvelli á föstudaginn klukkan 14.00 og verður í beinni útsendingu á Stöð 2 Sport.

Lið West Ham mun æfa í klukkustund síðdegis á fimmtudag og tekur Manchester City við að þeirri æfingu lokinni.

Tilkynninguna má lesa í heild sinni hér fyrir neðan:

„Miðar á stórleik Manchester City og West Ham sem fram fer á Laugardalsvelli þann 4. ágúst næstkomandi veita ekki aðeins aðgang að leiknum sjálfum heldur líka að opnum æfingum klúbbanna sem fram fara daginn fyrir leik. Leikmenn West Ham munu æfa í klukkustund seinni part fimmtudagsins 3. ágúst og að henni lokinni munu leikmenn Manchester City mæta til æfingar. Miðahafar fá þar með tækifæri á að sjá hvernig leikmenn liðanna undirbúa sig fyrir keppnisleik.

Á meðan æfingum stendur munu nokkrir heppnir miðaeigendur sem mæta á Laugardalsvöll eiga kost á því að hitta leikmenn úr Manchester City og West Ham að æfingu lokinni þar sem miðaeigendum gefst kostur á að spjalla við leikmenn og fá hjá þeim eiginhandaráritanir.

Enn fremur geta miðahafar átt von á ýmsum óvæntum glaðningi með því að fylgjast með Facebook síðu leiksins, facebook.com/thesupermatch2017. Í boði er allt frá árituðum treyjum til VIP ferða á leiki Manchester City og West Ham á Ethiad stadium og London stadium þegar liðin mætast á komandi keppnistímabili þar sem æfingasvæði liðanna verða heimsótt, hitta núverandi leikmenn ásamt fyrrum leikmönnum liðanna í móttöku á keppnisdegi.

Leikurinn sem fram fer á Laugardalsvelli verður síðasti æfingaleikur liðanna fyrir komandi keppnistímabil sem hefst í Englandi viku síðar og því lokahnykkurinn á undirbúningstímabili liðanna. Þar af leiðandi munu þau stilla upp sínu sterkasta byrjunarliði og leikmenn munu spila þennan leik eins og um hefðbundinn keppnisleik er að ræða. Gera má ráð fyrir því að leikmenn á borð við Sergio Aguero, Kevin De Bruyne, David Silva, Manuel Lanzini og Rahim Sterling verði allir í byrjunarliðunum, auk þess áhorfendur fá að sjá nýja leikmenn á borð við Chicharito og Kyle Walker klæðast treyjum nýju liða sinna í fyrsta sinn, að ónefndum Joe Hart sem mæta mun fyrrum liðsfélögum sínum en hann hefur verið lánaður frá Manchester City til West Ham fyrir komandi tímabil.

Þeir sem kaupa miða á leikinn á Laugardalsvelli geta átt von á óvæntum glaðningi, því auk þess að sjá þessi sögufrægu lið spila, fá miðahafar aðgang að opnum æfingum liðanna daginn fyrir leik.  Þá verður efnt til fjölda leikja þar sem miðahafar geta unnið VIP ferð á báða leiki Manchester City og West Ham í úrvalsdeildinni, leik West Ham og Manchester City, þar sem ekki einungis er farið á leikina, heldur líka farið á æfingasvæði liðanna, hægt að hitta leikmenn og svo mætti áfram telja.  Þeir sem kaupa miða á leikinn hér heima geta einnig unnið áritaðar treyjur, trefla og aðra minjagripi, yngri miðakaupendur geta átt möguleika á að leiða leikmenn inn á Laugardalsvöll, hitta leikmenn og loks er hægt að vinna sjónvarpsáskriftir að enska boltanum hjá Stöð 2 Sport.

Miðasala á leikinn fer fram á midi.is og kosta miðar frá 5.899 kr. Veittur er 50% afsláttur af miðaverði á stúkumiðum fyrir 16 ára og yngri. “