Sýruárásum fjölgar í London

Ráðist var á fimm manns í London í dag með sýru. Tilkynnt var um árásirnar fimm á rúmum klukkutíma. Sextán ára drengur var handtekinn grunaður um aðild að árásinni og er sem stendur í haldi lögreglu. Fimmtán ára drengur hefur einnig verið handtekinn. CNN og BBC greina frá.

Lögreglan á svæðinu segir að ráðist hafi verið á mennina í sitthvor lagi. Talið er að árásarmennirnir hafi notast við rafhjól og skvett á gangandi og hjólandi vegfarendur og rænt suma þeirra í leiðinni. Staðfest er að tveir einstaklingar sem slösuðust unnu sem sendlar fyrir Deliveroo og UberEATS. Þá hafa margir sendlar neitað að fara út með sendingar seint á kvöldin vegna atburðanna.

Einn er alvarlega slasaður þar sem sýrunni var skvett á andlit hans. Undanfarið hafa sýruárásir og árásir þar sem notast er við hættulegan vökva orðið algengari í London.

Árið 2014 voru 166 tilfelli skráð og árið 2015 voru þau 261. Í fyrra voru þau svo orðin 454 talsins. Árásir sem þessar eiga sér flestar stað í austurhluta borgarinnar.

Vökvinn hefur meðal annars verið notaður við innbrot og eru gengi líklegust til að notast við þess konar vopn. Vökvann er hægt að nálgast í verslunum og hefur lögreglan biðlað til kaupmanna að hafa augu með þeim vörum.

Sara Newton, innanríkisráðherra, segir að verið sé að endurskoða löggjöf vegna málsins. Hún nefndi jafnframt að það yrði erfitt að koma í veg fyrir þetta þar sem oft væru þetta efni sem væru til á öllum heimilum. Breska þingið mun ræða málið næstkomandi mánudag.

Almenningur hefur meðal annars þrýst á ráðamenn að nauðsynlegt sé að hafa leyfi fyrir því að kaupa hættuleg efni til að koma í veg fyrir að allir geti nálgast þau þegar þeim hentar.