Mun meiri olíumengun í Grafarvogi í dag en í gær

Óútskýrð olíumengun í Grafarvogi var umtalsvert meiri í dag heldur en í gær, það mikil að starfsmönnum heilbrigðiseftirlitsins var brugðið. Íbúasamtök Grafarvogs krefjast þess að borgaryfirvöld taki málið föstum tökum.

Fréttastofan greindi frá því í kvöldfréttum Stöðvar 2 í gær að mikil olíumengun sé í læk sem rennur í Grafarvoginn en um nokkurt skeið hafa komið upp mengunartilfelli á svæðinu sem ekki hefur verið hægt að rekja. Heilbrigðiseftirlit Reykjavíkur fékk tilkynningu um mengunina síðdegis í gær en ekki var hægt að senda starfsmenn á staðinn sökum anna.

Á þessu svæði stundar fólk útivist og sömuleiðis er viðkvæmt fuglalíf á staðnum og veittum við því athygli í gær að fiður þeirra væri smitað olíu sem grasbakkar við lækinnFréttastofan skoðaði aðstæður á staðnum í dag og ef eitthvað er þá var mengunin í læknum mun meiri en í gær og komu fulltrúar Heilbrigðiseftirlitsins á staðinn til þess að meta aðstæður.

„Mér lýst ekki vel á þetta. Það er töluverð brák hérna í læknum og það er mjög mikilvægt að finna upptökin. Ég mundi segja að þetta væri umtalsvert. Þetta á allavega ekki að vera svona,“ segir Rósa Magnúsdóttir, umhverfisstjóri hjá Heilbrigðiseftirliti Reykjavíkur.

Tilkynningar um mengun í læknum hafa komið endurtekið upp á síðkastið og eru tilfellin orðin þrjú.

„Þetta er ofanvatnsútrás sem að kemur bæði frá Grafarholti og hluta Hálsa-hverfisins. Við fórum um þar og fundum ekki upptökin. Sama þann fimmta. Við fórum og leituðum að þessu en okkur hefur ekki tekist að finna upptök þessarar mengunar,“ segir Rósa.

Íbúasamtök Grafarvogs krefjast þess að heilbrigðiseftirlitið bregðist strax við.

„Við lítum mjög alvarlegum augum á svona. Þarna er viðkvæmt náttúrulífssvæði. Leirurnar sem þorna á fjöru að þær eru fljótar að spillast alvarlega ef þetta er viðvarandi mengun og miðað við ástandið á læknum eins og við sáum í fréttum í gær að þá er þetta bara mjög alvarlegt mál,“ segir Árni Guðmundsson, varaformaður Íbúasamtaka Grafarvogs.

Árni segir það sérstakt að heilbrigðisyfirvöld hafi ekki fundi uppsprettu ítrekaðra mengunartilfella á svæðinu.

„Maður hefði haldið að með þeim tækjabúnaði sem yfirvöld ráða yfir ætti að vera sjá hvaðan hún er að koma, að minnsta kosti það svæði sem hún stoppar. Þannig að það ætti að vera hægt að nálgast það að mínu viti,“ segir Árni.

Ætla Íbúasamtök Grafarvogs að bregðast eitthvað við?

„Já, stjórnin mun koma saman fljótlega eftir helgi og kynna sér málið og gera fyrirspurn,“ segir Árni.