Ölgerðin festir kaup á Kú

Ölgerðin Egill Skallagrímsson hefur fest kaup á Kú mjólkurbúi. Í tilkynningu frá Ölgerðinni kemur fram að með kaupunum muni staða Kú á mjólkurmarkaði styrkjast til muna.

Er haft eftir Októ Einarssyni, stjórnarformanni Ölgerðarinnar, að Kú hafi verið ötull frumkvöðull frá stofnun og barist af einurð og afli gegn fákeppni á mjólkurmarkaði. „Með kaupum Ölgerðarinnar eykst sá slagkraftur án þess þó að að breyta frumkvöðlahugsjón fyrirtækisins þar sem hagur neytenda og framsýni ræður ríkjum,“ segir Októ.

Kú mjólkurbú var stofnað árið 2009 og hófst framleiðsla ári síðar. Ólafur Magnússon mun starfa áfram með Kú.

„Við höfum lent í ýmsu og það hefur ekki alltaf verið auðvelt að berjast á þeim fákeppnismarkaði sem ríkt hefur. Stuðningur Ölgerðarinnar styrkir okkur í þeirri baráttu sem framundan er og hleypir nýjum krafti í okkur,“ segir Ólafur.