Liðinu að sunnan skyldi mætt með heykvíslum

Eftir fimm ára reynslu af einkareknum grunnskóla eru Tálknfirðingar ekki að fara að snúa til baka. Skólastjórinn segir útkomuna betri nemendur.  Þetta kom fram í tíu mínútna þætti Stöðvar 2 um Tálknafjarðarskóla, sem sjá má hér að ofan. 

Margrét Pála Ólafsdóttir er forsvarsmaður Hjallastefnunnar ehf. sem rekur Tálknafjarðarskóla, en þar hittum við hana með þeim Helgu Birnu Berthelsen, fráfarandi skólastjóra, og Steinunni Margréti Guðmundsdóttur, verðandi skólastjóra.

Það þótti djarft hjá sveitarfélaginu að semja við einkafyrirtæki um að reka grunnskólann, leikskólann og tónlistarskólann. Í byrjun mætti þeim margskyns andstaða og mótmæli, - raunar þriggja ára átök.

„Rekstur skólans á Tálknafirði ólöglegur“, sagði í frétt Ríkisútvarpsins þar sem vitnað var í bréf menntamálaráðuneytis en þá var Katrín Jakobsdóttir ráðherra málaflokksins.

Margrét Pála segir hins vegar að þetta hafi ekki verið bannað og því hlyti þetta að vera leyfilegt. Hún vitnaði í einn föðurinn þegar hún lýsti stemmningunni hjá heimamönnum:

„Hann sagði við mig: Hafðu engar áhyggjur. Ef þetta ráðuneytislið og einhverjir að sunnan ætla að koma hingað og stoppa okkur þá mætum við þeim við afleggjarann með heykvíslar,“ sagði Margrét Pála og hló.

„Og nú er litli Tálknafjörður búinn að breyta landslögum. Gleymum því ekki. Það er komin sérstök heimild inn, sem Illugi Gunnarsson lauk við, sem eitt af sínum síðustu verkum sem menntamálaráðherra,“ sagði Margrét Pála.

Helga Birna hefur búið á Tálknafirði frá unga aldri. Hún sagði almenna ánægju ríkja meðal íbúa með samstarfið við Hjallastefnuna og skólinn væri að skila betri nemendum. 

„Á síðustu árum erum við að útskrifa nemendur sem eru að fá hærri einkunnir á samræmdum prófum. Þeir eru sjálfstæðari í vinnubrögðum og kennarar í framhaldsskólum gefa þeim alveg fyrsta flokks einkunnir fyrir vinnubrögð,“ sagði Helga Birna. 

-Þannig að þið eruð ekki að fara að snúa til baka? 

„Nei, við erum ekki að fara að snúa til baka.“

Tálknafjörður telst lítið samfélag með um 250 íbúa en í vetur voru 40 nemendur í grunnskólanum og 12 í leikskólanum. Steinunn Margrét tekur nú við skólastjórn af Helgu Birnu. 

„Það leggst mjög vel í mig. Ég hef svo góða tilfinningu fyrir þessu. Það eru stífar kannanir og þær koma jákvætt út. Það er búið að gera mjög góða hluti og þetta er mjög fín aðstaða,“ sagði Steinunn Margrét.